தந்தையின் வாக்குறுதியை நிறைவேற்றிய மகள்: ஆட்சியரிடம் ரூ.50 ஆயிரம் அளித்தாா்

தனது தந்தை எழுதிய உயிலின்படி, இருதய நோயால் பாதிக்கப்பட்ட ஏழைகளுக்கு உதவும் வகையில் ரூ.50 ஆயிரம் பணத்தை கடலூா் மாவட்ட ஆட்சியரிடம் பெண் ஒருவா் திங்கள்கிழமை வழங்கினாா்.

கடலூா் திருப்பாதிரிபுலியூா், தேரடித் தெருவைச் சோ்ந்தவா் ஆறுமுகசுந்தரம். வட்டாட்சியராக பணிபுரிந்த இவா், கடந்த 1996-ஆம் ஆண்டு ஓய்வு பெற்றாா். 2019-ஆம் ஆண்டு நவ.17-ஆம் தேதி காலமானாா். இவா் தனது இளைய மகள் கயல்விழிக்கு எழுதிய உயில் சாசனத்தில், தமது நன்செய் நிலம் மூலம் கிடைக்கும் வருவாயிலிருந்து ஆண்டுதோறும் ரூ.50 ஆயிரத்தை தனது மனைவி ஏ.ரமணி அம்மாளின் நினைவாக, கடலூா் வட்டத்தில் இருதய நோயால் பாதிக்கப்பட்ட ஏழைகளுக்கு உதவிடும் வகையில் கடலூா் மாவட்ட ஆட்சியரிடம் செலுத்த வேண்டும் என்று தெரிவித்துள்ளாா்.

தந்தையின் வாக்குறுதியை நிறைவேற்றும் வகையில் கயல்விழி திங்கள்கிழமை கடலூா் மாவட்ட ஆட்சியா் அலுவலகத்தில் ஆட்சியா் சந்திரசேகர சாகமூரியை சந்தித்து ரூ.50 ஆயிரத்துக்கான காசோலையை வழங்கினாா். இவருக்கு மாவட்ட ஆட்சியா், மாவட்ட எஸ்பி ஸ்ரீஅபிநவ் உள்ளிட்டோா் பாராட்டுத் தெரிவித்தனா்.