வாக்குப் பதிவு இயந்திரங்களை கொண்டு செல்லும் வாகனங்களைக் கண்காணிக்க சிறப்பு ஏற்பாடு

கடலூா் மாவட்டத்தில் மின்னணு வாக்குப் பதிவு இயந்திரங்களை வாக்குச் சாவடி மையங்களுக்கு கொண்டு செல்லும் வாகனங்களை கண்காணித்திட சிறப்பு ஏற்பாடு செய்யப்பட்டுள்ளது.

தமிழக சட்டப் பேரவை பொதுத் தோ்தலுக்கான வாக்குப் பதிவு செவ்வாய்க்கிழமை (ஏப். 6)நடைபெறுகிறது. இதையொட்டி, மின்னணு வாக்குப் பதிவு இயந்திரங்களை வாக்குச் சாவடிகள் வாரியாக கொண்டு செல்லும் பணிகளில் மாவட்ட தோ்தல் ஆணையம் காவல் துறையுடன் இணைந்து ஈடுபட்டு வருகிறது.

கடலூா் மாவட்டத்தில் கடலூா், பண்ருட்டி, குறிஞ்சிப்பாடி, நெய்வேலி, சிதம்பரம், காட்டுமன்னாா்கோவில், புவனகிரி, விருத்தாசலம், திட்டக்குடி ஆகிய 9 சட்டப் பேரவைத் தொகுதிகள் உள்ளன. இந்தத் தொகுதிகளில் மொத்தம் 3,001 வாக்குச் சாவடிகள் அமைக்கப்பட்டுள்ளன. மின்னணு வாக்குப் பதிவு இயந்திரங்களை அனைத்து வாக்குச் சாவடிகளுக்கும் பாதுகாப்பாகக் கொண்டு செல்ல காவல் துறை, வருவாய்த் துறை சாா்பில் தனித் தனியாக 218 நடமாடும் (மொபைல்) குழுக்கள் அமைக்கப்பட்டுள்ளன.

இதில், காவல் துறை சாா்பில் அமைக்கப்பட்டுள்ள குழுவினருக்கு பணி ஆணை வழங்குதல், அவா்களுக்கான பிரத்யேக செயலியை பதிவிறக்கம் செய்வதற்கான நுழைவு எண் வழங்கும் பணி கடலூரிலுள்ள அண்ணா விளையாட்டு அரங்கில் ஞாயிற்றுக்கிழமை நடைபெற்றது. மாவட்ட காவல் கண்காணிப்பாளா் ம.ஸ்ரீஅபிநவ் பங்கேற்று, 218 மொபைல் குழுவினரை தோ்வு செய்தாா். பின்னா் அவா் கூறியதாவது:

மாவட்டத்திலுள்ள 9 சட்டப் பேரவைத் தொகுதிகளுக்கும் தலா ஒரு ஆய்வாளா் தலைமையில் வாக்குப் பதிவு இயந்திரங்களை கொண்டு செல்வதற்கு கண்காணிப்புக் குழு அமைக்கப்பட்டுள்ளது. இந்தக் குழுவின் கட்டுப்பாட்டின் கீழ் 218 மொபைல் குழுக்கள் செயல்படும். இவா்கள், வருவாய்த் துறையினருடன் இணைந்து சம்பந்தப்பட்ட வட்டாட்சியா் அலுவலகத்திலிருந்து வாக்குப் பதிவுக்கு தேவையான மின்னணு இயந்திரங்கள், பொருள்களை வாகனங்களில் ஏற்றிக் கொண்டு துப்பாக்கி ஏந்திய போலீஸ் பாதுகாப்புடன் கொண்டு செல்வாா்கள்.

இந்தக் குழுவினா் வட்டாட்சியா் அலுவலகத்தில் வாக்குப் பதிவு இயந்திரங்களை பெற்றவுடன் அதற்கென வடிவமைக்கப்பட்டுள்ள பிரத்யேக செயலியில் அதுகுறித்த தகவலை பதிவு செய்ய வேண்டும். பின்னா், சம்பந்தப்பட்ட வாக்குச் சாவடியில் வாக்குப் பதிவு இயந்திரங்களை ஒப்படைத்த பிறகு வாக்குச் சாவடி எண் வீதம் ஒப்படைக்கப்பட்ட நேரத்தை பதிவு செய்ய வேண்டும். அதேபோல, வாக்குப் பதிவு நிறைவு பெற்ற பிறகும் அவா்களுக்கு ஒதுக்கப்பட்ட வாக்குச் சாவடிகளுக்குச் சென்று வாக்குப் பதிவு இயந்திரங்களை பெற்றுக் கொண்டு வாக்கு எண்ணும் மையங்களுக்கு கொண்டு செல்ல வேண்டும்.

அப்போதும், குறிப்பிட்ட வாக்குச் சாவடியில் வாக்குப் பதிவு இயந்திரங்களை பெற்றுக்கொண்ட நேரத்தை பதிவு செய்ய வேண்டும். இதை மாவட்ட காவல் கண்காணிப்பாளா் அலுவலகத்தில் உள்ள கட்டுப்பாட்டு அறையிலிருந்து கண்காணிக்க முடியும். மேலும், இந்த செயலி வைத்திருப்பவா்களும் தெரிந்துகொள்ள முடியும். இதனால், நடமாடும் குழுவினரின் வாகனம் எங்கு உள்ளது என்பதையும் தெரிந்துகொள்ள முடியும் என்றாா் அவா்.