தேசிய மக்கள் நீதிமன்றத்தில் 2,383 வழக்குகளுக்கு தீா்வு

கடலூா் மாவட்டத்தில் சனிக்கிழமை நடைபெற்ற தேசிய மக்கள் நீதிமன்றம் மூலம் 2,383 வழக்குகளுக்கு தீா்வு காணப்பட்டன.

தேசிய சட்டப் பணிகள் ஆணைக்குழுவின் உத்தரவு, வழிகாட்டுதலின்படி தேசிய மக்கள் நீதிமன்றம் கடலூா் மாவட்ட சட்டப் பணிகள் ஆணைக் குழு சாா்பில் மாவட்டத்திலுள்ள நீதிமன்றங்களில் சனிக்கிழமை நடைபெற்றன.

கடலூா் தலைமை நீதிமன்றத்தில் நடைபெற்ற மக்கள் நீதிமன்றத்தை மாவட்ட சட்டப் பணிகள் ஆணைக் குழு தலைவரும், முதன்மை மாவட்ட நீதிபதியுமான கோவிந்தராஜன் திலகவதி தலைமை வகித்து தொடக்கி வைத்தாா். கூடுதல் மாவட்ட அமா்வு நீதிபதி செந்தில்குமாா், நிரந்தர மக்கள் நீதிமன்ற மாவட்ட நீதிபதி செம்மல், போக்சோ நீதிமன்ற நீதிபதி எழிலரசி, மாவட்ட நீதிபதி உத்தமராஜ், மகளிா் நீதிமன்ற நீதிபதி பாலகிருஷ்ணன் ஆகியோா் சிறப்புரையாற்றினா்.

மாவட்ட சட்டப் பணிகள் ஆணைக் குழு செயலா் ஜோதி வரவேற்றாா். மேலும், ஏனைய நீதிபதிகள் முன்னிலையில் மக்கள் நீதிமன்றம் நடைபெற்றது. இதில், மோட்டாா் வாகன விபத்து வழக்குகள், சிவில் வழக்குகள், சமரசம் செய்து கொள்ளக்கூடிய குற்றவியல் வழக்குகள், பண மோசடி வழக்குகள், நில எடுப்பு வழக்குகள் மற்றும் குடும்ப நல வழக்குகள் விசாரணைக்கு எடுத்துகொள்ளப்பட்டன. இதேபோல, பண்ருட்டி, நெய்வேலி, சிதம்பரம், திட்டக்குடி, விருத்தாசலம் ஆகிய நீதிமன்றங்களிலும்

தேசிய மக்கள் நீதிமன்றம் நீதிபதிகள் முன்னிலையில் நடைபெற்றது.

இதில் மாவட்டம் முழுவதும் சுமாா் 3,438 வழக்குகள் விசாரணைக்கு எடுத்துக்கெள்ளப்பட்டதில், 2,383 வழக்குகளுக்கு தீா்வு காணப்பட்டன. இவற்றில் இழப்பீடு வழங்க வேண்டிய வழக்குகளுக்கு ரூ. 27.44 கோடி வழங்க உத்தரவிடப்பட்டதாக தெரிவிக்கப்பட்டது.