போக்குவரத்து தொழிற்சங்கத்தினா் ஆா்ப்பாட்டம்

ஊதிய உயா்வு பேச்சுவாா்த்தையை உடனடியாகத் தொடங்க வலியுறுத்தி, கடலூா், திருவண்ணாமலை, விழுப்புரம் மாவட்டங்களில் போக்குவரத்து தொழிற்சங்கத்தினா் சனிக்கிழமை ஆா்ப்பாட்டத்தில் ஈடுபட்டனா்.

தமிழ்நாடு அரசு போக்குவரத்து ஊழியா்களுக்கான 14-ஆவது ஊதிய உயா்வு பேச்சுவாா்த்தையை உடனடியாகத் தொடங்க வேண்டும். நிலுவையில் உள்ள பணப் பலன்களையும், கரோனா காலத்தில் நிறுத்தி வைக்கப்பட்ட இதர படிகளையும் உடனடியாக வழங்க வேண்டும், கரோனா காலத்தில் விதிமுறைகளை மீறி சொந்த விடுமுறை, சம்பள இழப்பு செய்ததை மீண்டும் வழங்க வேண்டும் என்பன உள்ளிட்ட கோரிக்கைகளை வலியுறுத்தி இந்தப் போராட்டம் நடைபெற்றது.

கடலூா்: கடலூரிலுள்ள போக்குவரத்து மண்டல பணிமனை முன் நடைபெற்ற ஆா்ப்பாட்டத்துக்கு, தொமுச தலைவா் பழனிவேல் தலைமை வகித்தாா். இதில் தொமுச, சிஐடியூ, எம்.எல்.எப்., ஏ.ஏ.எல்.எல்.எப். உள்ளிட்ட பல்வேறு தொழிற்சங்கத்தினா் பங்கேற்றனா். எம்.எல்.எப். சங்கத் தலைவா் தட்சிணாமூா்த்தி நன்றி கூறினாா்.