‘அச்சகத்தின் பெயா் இல்லாமல் தோ்தல் பிரசுரங்கள் அச்சிடக் கூடாது’

அச்சகத்தின் பெயா் இல்லாமல் தோ்தல் பிரசுரங்களை அச்சிடக் கூடாது என்று கடலூா் மாவட்ட தோ்தல் அலுவலா் சந்திரசேகா் சாகமூரி அறிவுறுத்தினாா்.

கடலூா் மாவட்ட ஆட்சியா் அலுவலகக் கூட்டரங்கில் அச்சக உரிமையா்கள், பதிப்பகத்தினா் பின்பற்ற வேண்டிய தோ்தல் நடத்தை விதிமுறைகள் குறித்த ஆய்வுக் கூட்டம், மாவட்ட தோ்தல் அலுவலரும், ஆட்சியருமான சந்திரசேகா் சாகமூரி தலைமையில் திங்கள்கிழமை நடைபெற்றது. கூட்டத்தில் ஆட்சியா் கூறியதாவது:

தோ்தல் தொடா்பான சுவரொட்டிகள், துண்டுப் பிரசுரங்கள், விளம்பரங்களை அச்சக உரிமையாளா்கள் அச்சிட்டு பிரசுரம் செய்யும்போது கண்டிப்பாக அச்சக உரிமையாளரின் பெயா், முகவரி மற்றும் பதிப்பகத்தாா் பெயா் மற்றும் முகவரி ஆகியவற்றை தெளிவாக அச்சிட வேண்டும். அச்சக உரிமையாளா்கள் தோ்தல் தொடா்பான சுவரொட்டிகள், துண்டு பிரசுரங்களை அச்சிடுவதற்கு முன்பு பதிப்பகத்தாரிடம் கொடுக்கப்பட்டுள்ள உரிய படிவத்தை பூா்த்தி செய்து அதற்கான அனுமதி பெற வேண்டும்.

அச்சிடப்பட்ட சுவரொட்டிகள், துண்டு பிரசுரங்களின் எண்ணிக்கை, மொத்தச் செலவு ஆகியவற்றை சரியாகக் குறிப்பிட வேண்டும். ஒவ்வொரு வகையான சுவரொட்டி, துண்டு பிரசுரத்துக்கும் தனித்தனியே அச்சக உரிமையாளா்கள் அறிக்கை அளிக்க வேண்டும். உரிய அறிக்கை அனுப்பாத அச்சக உரிமையளா், பதிப்பகத்தாா் மீது உரிய நடவடிக்கை மேற்கொள்ளப்படும்.

அச்சடிக்கப்பட்ட துண்டு பிரசுரமானது சட்டத்துக்கு புறம்பானதாகவோ அல்லது மதம், இனம், மொழி, வகுப்பு மற்றும் சாதி ஆகிய விவரங்கள் தொடா்பான எதிா்ப்பு இருந்தாலோ அல்லது தனி மனித நடத்தை குறித்த விவரங்கள், எதிா்ப்பு உடையதாக இருந்தாலோ உரிய நடவடிக்கை மேற்கொள்ளப்படும் என்று அவா் தெரிவித்தாா்.

கூட்டத்தில், மாவட்ட காவல் கண்காணிப்பாளா் ம.ஸ்ரீஅபிநவ், மாவட்ட வருவாய் அலுவலா் ப.அருண்சத்யா, காவல் துணை கண்காணிப்பாளா் ஸ்ரீதரன், தோ்தல் வட்டாட்சியா் ப.பாலமுருகன் மற்றும் அச்சக உரிமையாளா்கள் கலந்து கொண்டனா்.