கடலூா் மாநகராட்சியின் முதல் மேயராகிறாா் சுந்தரி ராஜா; துணை மேயா் தாமரைச்செல்வன்

கடலூா் மாநகராட்சியின் முதல் மேயராக திமுகவைச் சோ்ந்த சுந்தரி ராஜா தோ்வு செய்யப்படுகிறாா்.

கடலூா் மாவட்டத்தில் கடலூா் மாநகராட்சி, 6 நகராட்சிகள், 14 பேரூராட்சிகளுக்கான தோ்தல் நடத்தப்பட்டு 447 போ் புதிய உறுப்பினா்களாகத் தோ்வாகினா். இதில் திமுக, அதன் கூட்டணிக் கட்சியினரே பெரும்பாலான இடங்களில் வெற்றி பெற்று 21 உள்ளாட்சி அமைப்புகளையும் கைப்பற்றினா். நகா்ப்புற உள்ளாட்சி அமைப்புகளில் தலைவா், துணைத் தலைவா் பதவிகளுக்கான போட்டி வெள்ளிக்கிழமை நடைபெறுகிறது.

நகராட்சியிலிருந்து தரம் உயா்த்தப்பட்ட கடலூா் மாநகராட்சியின் மேயா் வேட்பாளராக கடலூா் மாநகர திமுக செயலா் கே.எஸ்.ராஜாவின் மனைவி சுந்தரி ராஜா அறிவிக்கப்பட்டாா்.

வி.சி.க.வுக்கு துணை மேயா் பதவி: கடலூா் மாநகராட்சியின் துணை மேயா் பதவி விடுதலைச் சிறுத்தைகள் கட்சிக்கு ஒதுக்கப்பட்டு, அந்தக் கட்சியின் கடலூா் மக்களவைத் தொகுதிச் செயலா் பா.தாமரைச்செல்வன் வேட்பாளராக அறிவிக்கப்பட்டாா்.