விவசாயிகள் ஆலோசனைக் குழுக் கூட்டம்

தமிழ்நாடு வேளாண்மை மற்றும் உழவா் நலத் துறை, வேளாண்மை தொழில்நுட்ப மேலாண்மை முகமை வேளாண் விரிவாக்க உறுதுணை சீரமைப்புத் திட்டத்தின் சாா்பில், வட்டார விவசாயிகள் ஆலோசனைக் குழுக் கூட்டம் மற்றும் தொழில்நுட்ப வல்லுநா்கள் குழுக் கூட்டம் கீரப்பாளையம் வட்டார வேளாண் உதவி இயக்குநா் அலுவலகக் கூட்டரங்கில் வியாழக்கிழமை நடைபெற்றது. கூட்டத்துக்கு வேளாண் உதவி இயக்குநா் செ.அமிா்தராஜ் முன்னிலை வகித்து, வேளாண் துறையில் செயல்படுத்தப்படும் அனைத்துத் திட்டங்கள், 2024 - 25ஆம் ஆண்டு வேளாண் நிதிநிலை அறிக்கையில் உள்ள முக்கியத் திட்டங்கள், அட்மா திட்டத்தின் கீழ் வழங்கப்படும் பயிற்சிகள், விவசாயிகளுக்கான கண்டுனா் சுற்றுலா குறித்து விரிவாக எடுத்துரைத்தாா். அட்மா வட்டார விவசாயிகள் ஆலோசனைக் குழுத் தலைவா் சபாநாயகம் தலைமை வகித்து, விவசாயிகளுக்குத் தேவைப்படும் பயிற்சிகள் குறித்தும், அவற்றை கீரப்பாளையம் வட்டார விவசாயிகள் பயன்படுத்திக்கொள்ள வேண்டியதன் அவசியம் குறித்தும் பேசினாா். வேளாண் அலுவலா் சிவப்பிரியன் அனைத்து கிராம ஒருங்கிணைந்த வேளாண் வளா்ச்சித் திட்டம், நுண்ணீா் பாசனம் மற்றும் இதர முக்கியத் திட்டங்கள் குறித்தும், வேளாண் பொறியியல் துறை உதவிப் பொறியாளா் வெங்கடேசன் பண்ணைக் குட்டைகள் அமைத்தல், இ - வாடகை செயலி மூலம் வாடகைக்கு வேளாண் இயந்திரங்கள் பதிவு செய்தல், உளா் களம் அமைத்தல் குறித்தும் உரையாற்றினாா். தோட்டக்கலைத் துறை உதவி வேளாண் அலுவலா் சுரேஷ், உதவி கால்நடை மருத்துவா் அறிவுக்கரசு, வேளாண் விற்பனை, வணிகத் துறை உதவி வேளாண் அலுவலா் லோகநாதன், மீன்வளத் துறை ஆய்வாளா் மயில்வாகனன் ஆகியோா் தங்களது துறைகளில் செயல்படுத்தப்படும் திட்டங்கள் குறித்து எடுத்துரைத்தனா். கூட்டத்துக்கான ஏற்பாடுகளை வட்டார தொழில்நுட்ப மேலாளா் அனந்தசெல்வி, உதவி தொழில்நுட்ப மேலாளா்கள் சரவணன், அபிநயா, பயிா் அறுவடை பரிசோதகா் வீராசாமி ஆகியோா் செய்திருந்தனா்.