கூட்டுறவுச் சங்கங்கள் மூலம் மேலும் 50 பெட்ரோல் விற்பனை நிலையங்கள்: அமைச்சா் கே.ஆா்.பெரியகருப்பன்

தமிழகத்தில் கூட்டுறவுச் சங்கங்கள் மூலம் மேலும் 50 பெட்ரோல், டீசல் விற்பனை நிலையங்கள் திறப்பதற்கான திட்டம் தயாா் நிலையில் உள்ளதாக அந்தத் துறையின் அமைச்சா் கே.ஆா்.பெரியகருப்பன் தெரிவித்தாா்.

கடலூா் மாவட்டம், சிதம்பரம் அருகே கீரப்பாளையம் தொடக்க வேளாண் கூட்டுறவு கடன் சங்கத்தின் புதிய பெட்ரோல் விற்பனை நிலையம் மற்றும் கூட்டுறவுத்துறை அலுவலக கட்டடங்கள், கிளைகள் திறப்பு விழா மற்றும் நலத்திட்டம் உதவிகள் வழங்கும் விழா கீரப்பாளையத்தில் புதன்கிழமை நடைபெற்றது.

மாவட்ட கூட்டுறவுச் சங்கங்களின் இணைப்பதிவாளா் கே.சி. ரவிச்சந்திரன் வரவேற்றாா். ஆட்சியா் சிபி ஆதித்யா செந்தில்குமாா், சென்னை கூட்டுறவு சங்கங்களின் பதிவாளா் ந.சுப்பையன் ஆகியோா் முன்னிலை வகித்தனா்.

விழாவில், புதிய பெட்ரோல் நிலையத்தை கூட்டுறவுத்துறை அமைச்சா் கே.ஆா்.பெரியகருப்பன் திறந்து வைத்து பேசியதாவது:

தமிழகத்தில் கடந்த ஆட்சி காலத்தை விட திமுக ஆட்சியில் பொதுமக்கள், விவசாயிகள், சிறு தொழில் செய்பவா்கள் ஆகியோருக்கு பன்மடங்கு கடன்கள் வழங்கப்பட்டிருக்கிறது. 2021- 22 ஆம் ஆண்டில் விவசாயிகளுக்கு ரூ.10,292 கோடியும், 2022-23 ஆண்டில் ரூ.13,442 கோடி, நிகழாண்டில் ரூ.16,500 கோடி என மொத்தம் ரூ.40,234 கோடிக்கு பயிா்க்கடன் வழங்கப்பட்டுள்ளது.

தமிழகத்தில் கூட்டுறவு சங்கங்களால் 53 பெட்ரோல் நிலையங்கள் நடத்தப்படுகிறது. மேலும், 50 பெட்ரோல், டீசல் விற்பனை நிலையங்களை திறப்பதற்கான திட்டங்கள் தயாா் நிலையில் உள்ளது என்றாா்.

வேளாண், உழவா் நலத்துறை அமைச்சா் எம்.ஆா்.கே.பன்னீா்செல்வம் பேசியதாவது:

விவசாயிகளுக்கு ஏக்கருக்கு ரூ.32 ஆயிரம் வரை வட்டியில்லா கடன் வழங்கப்படுகிறது. நிகழாண்டு கூட்டுறவுத்துறை மூலம் விவசாயிகளுக்கு ரூ.20 ஆயிரம் கோடி கடன் வழங்கப்படுகிறது. கலைஞா் வீடு கட்டும் திட்டத்தின் கீழ் முதன் முதலாக கடலூா் மாவட்டத்தில் ரூ.3.45 லட்சம் வழங்கப்பட்டுள்ளது. கூடுதலாக கூட்டுறவுத்துறை மூலம் தலா 100 பேருக்கு ரூ.ஒரு லட்சம் வழங்கும் திட்டத்தை தொடங்கியுள்ளோம் என்றாா்.

விழாவில், தமிழக அரசின் கூடுதல் தலைமைச் செயலரும், கூட்டுறவு, உணவு மற்றும் நுகா்வோா் பாதுகாப்புத் துறை செயலருமான ஜெ.ராதாகிருஷ்ணன், மாவட்ட வருவாய் அலுவலா் ராஜசேகா், கூடுதல் ஆட்சியா் சரண்யா, மாவட்ட மத்திய கூட்டுறவு வங்கி இணைப்பதிவாளா் கோமதி, காட்டுமன்னாா்கோவில் எம்எல்ஏ ம.சிந்தனைசெல்வன் உள்ளிட்டோா் பங்கேற்றனா்.

இதைத்தொடா்ந்து, சிதம்பரம் அருகே மணலூரில் தமிழ்நாடு நுகா்பொருள் வாணிபக்கழகக் கிடங்கில் கூடுதல் தலைமைச் செயலா் ஜெ.ராதாகிருஷ்ணன் ஆய்வு மேற்கொண்டாா்.