கெடிலம் ஆற்றில் ரூ.37 கோடியில் தடுப்பணை அமைக்கும் பணி: அமைச்சா் சி.வெ.கணேசன் தொடங்கிவைத்தாா்

கடலூா் மாவட்டம், நெய்வேலி சட்டப் பேரவைத் தொகுதி, திருவாமூா் ஊராட்சி, காமாட்சிபேட்டை கெடிலம் ஆற்றின் குறுக்கே ரூ.37 கோடியில் தடுப்பணை அமைக்கும் பணியை அமைச்சா் சி.வெ.கணேசன் பூமிபூஜை செய்து வியாழக்கிழமை தொடங்கிவைத்தாா்.

பண்ருட்டி ஒன்றியம், திருவாமூா், காமாட்சிப்பேட்டை ஆகிய கிராமங்களில் நிலத்தடி நீா் உப்புத்தன்மை கொண்டது. இதனால், கிராம மக்கள் குடிநீரின்றி அவதிப்பட்டு வருகின்றனா். காமாட்சிப்பேட்டை கிராமத்தில் கெடிலம் ஆற்றின் குறுக்கே தடுப்பணை அமைத்தால், திருவாமூா், காமாட்சிப்பேட்டை, எலந்தம்பட்டு, செம்மேடு, கருக்கை உள்ளிட்ட கிராமங்களில் நிலத்தடி நீா்மட்டம் உயா்ந்து, நன்னீா் மேம்படுவதுடன், குடிநீா் மற்றும் விவசாயத்துக்கான தண்ணீா் வசதி கிடைக்கும். எனவே, காமாட்சிப்பேட்டை கெடிலம் ஆற்றின் குறுக்கே தடுப்பணை அமைக்க வேண்டும் என கிராம மக்கள் கோரிக்கை விடுத்தனா்.

அதன்பேரில், காமாட்சிப்பேட்டை கிராமத்தில் கெடிலம் ஆற்றின் குறுக்கே ரூ.37 கோடி மதிப்பில் தடுப்பணை அமைப்பதற்கான பூமிபூஜை நடைபெற்றது. மாவட்ட ஆட்சியா் சிபி ஆதித்யா செந்தில் குமாா் தலைமை வகித்தாா். நெய்வேலி எம்எல்ஏ சபா.ராசேந்திரன் முன்னிலை வகித்தாா். மாநில தொழிலாளா் நலன் மற்றும் திறன் மேம்பாட்டுத் துறை அமைச்சா் சி.வெ.கணேசன் பூமிபூஜையில் பங்கேற்று அடிக்கல் நாட்டி பணியை தொடங்கிவைத்தாா்.

அப்போது, அமைச்சா் சி.வெ.கணேசன் பேசியதாவது: கெடிலம் ஆற்றின் குறுக்கே காமாட்சிப்பேட்டை கிராமத்தில் ரூ.37 கோடியில் தடுப்பணை கட்டப்பட உள்ளது. இதில், ஆற்றின் குறுக்கே 205 மீட்டா் நீளத்துக்கு தடுப்பணை, இரு கரைகளின் முன் பகுதியில் தலா 300 மீட்டா், பின் பகுதியில் தலா 125 மீட்டா் வீதம் என மொத்தம் 850 மீட்டா் வெள்ள தடுப்புச் சுவா், தடுப்பணையின் முன் பகுதியில் 1,400 மீட்டா், பின் பகுதியில் 2,000 மீட்டா் மண் கரைகள் அமைக்கப்பட உள்ளன.

இதன் மூலம், காமாட்சிப்பேட்டை மற்றும் அதைச் சுற்றியுள்ள கிராமப் பகுதிகளில் உள்ள 234 ஆழ்துளைக் கிணறுகள் மூலம் சுமாா் 3,446 ஏக்கா் விவசாய நிலங்கள் பயன்பெறும். இதேபோல, 10 ஆயிரம் மக்களின் குடிநீா் தேவை நிறைவு செய்யப்படும்.

இதேபோல, ரூ.14 கோடி மதிப்பில் திருவாமூா் பகுதியில் தெற்கு மலட்டாற்றில் தடுப்பணை சீரமைப்பு மற்றும் வெள்ளத்தடுப்பு பணிகள் நடைபெற உள்ளன. இந்தப் பணிகள் உள்பட நெய்வேலி சட்டப் தொகுதியில் நீா்வளத் துறை சாா்பில் சுமாா் ரூ.100 கோடி மதிப்பில் திட்டப் பணிகள் நடைபெறுகின்றன என்றாா்.

நிகழ்ச்சியில் நீா்வளத் துறை செயற்பொறியாளா் பாலமுருகன், உதவிச் செயற்பொறியாளா் ரஜினிகாந்த், பண்ருட்டி வட்டாட்சியா் பிரகாஷ் மற்றும் துறை சாா்ந்த அலுவலா்கள் உள்பட பலா் கலந்துகொண்டனா்.