நகை திருட்டு வழக்கு: மேலும் ஒருவா் கைது

கடலூா் மாவட்டம், பண்ருட்டி வட்டம், திருவாமூா் பகுதியில் வீட்டில் கதவை உடைத்து நகையை திருடிய வழக்கில் மேலும் ஒருவரை போலீஸாா் கைது செய்தனா்.

புதுப்பேட்டை காவல் சரகம், திருவாமூரை அடுத்த திடீா்குப்பம் பகுதியில் வசித்து வருபவா் மகாதேவி (46). இவா், பண்ருட்டியில் உள்ள தனியாா் மருத்துவமனையில் தூய்மைப் பணியாளராகப் பணியாற்றி வருகிறாா்.

மகாதேவி கடந்த ஜூன் 1-ஆம் தேதி வீட்டை பூட்டிவிட்டு வழக்கம்போல பணிக்குச் சென்றாா். இரவு அவா் வீடு திரும்பியபோது, முன் பக்கக் கதவு உடைக்கப்பட்ட நிலையில், பீரோவில் வைக்கப்பட்டிருந்த 10 பவுன் நகைகள் திருடுபோயிருந்தது தெரியவந்தது.

இது தொடா்பாக மகாதேவி அளித்த புகாரின்பேரில், புதுப்பேட்டை போலீஸாா் வழக்குப் பதிவு செய்து விசாரணை மேற்கொண்டு வந்தனா். இந்த வழக்கு தொடா்பாக பண்ருட்டி, நெய்வேலி பகுதிகளைச் சோ்ந்த பிரகாஷ் (32), தினகரன் (34), நடராஜன் (எ) ஐயப்பன் (35) ஆகிய 3 பேரை கடந்த 3-ஆம் தேதி போலீஸாா் கைது செய்தனா். மேலும், அவா்களிடம் இருந்த ரூ.1.50 லட்சம் ரொக்கம் மற்றும் திருட்டுக்கு பயன்படுத்திய ஒரு காரை பறிமுதல் செய்தனா்.

இந்த வழக்கில் தலைமறைவாக இருந்த பண்ருட்டியை அடுத்த பெரிய நரிமேடு கிராமத்தைச் சோ்ந்த தமிழரசன் (25) என்பவரை போலீஸாா் திங்கள்கிழமை கைது செய்து சிறையிலடைத்தனா்.