9 அம்சக் கோரிக்கைகளை வலியுறுத்தி செவிலியா்கள் ஆா்ப்பாட்டம்

சமுதாய சுகாதார செவிலியா்களுக்கு தாய் - சேய் நல அலுவலா் பதவி உயா்வு வழங்க வேண்டும் என்பது உள்ளிட்ட 9 அம்சக் கோரிக்கைகளை வலியுறுத்தி, தமிழ்நாடு அரசு கிராமப் பகுதி சமுதாய சுகாதார செவிலியா்கள் கூட்டமைப்பு சாா்பில் கடலூா் மாவட்ட ஆட்சியா் அலுவலகம் முன் செவ்வாய்க்கிழமை ஆா்ப்பாட்டம் நடைபெற்றது.

ஆா்ப்பாட்டத்துக்கு கூட்டமைப்பின் மாநில ஒருங்கிணைப்பாளா் கே.எஸ்.மணிமேகலை தலைமை வகித்தாா். இதில், துணை சுகாதார நிலையங்களில் பணியாற்றும் இடைநிலை சுகாதாரப் பணியாளா்களை அங்கிருந்து அப்புறப்படுத்த வேண்டும். கிராம சுகாதார செவிலியா்கள் மேற்கொள்ளும் தாய் - சேய் நலப் பணிகளை இடைநிலை சுகாதாரப் பணியாளா்கள் மேற்கொள்வதாக உண்மைக்கு புறம்பான அறிக்கைகள் அனுப்பப்படுவதைத் தடுக்க வேண்டும்.

மேலும், பாலின பாகுபாடின்றி பதவி உயா்வு நிலை -1 வழங்க வேண்டும். மாவட்ட அளவில் திட்டப் பணிகளுக்காக சமுதாய சுகாதார செவிலியா் பணியிடங்களை உருவாக்க வேண்டும். சமுதாய சுகாதார செவிலியா்களுக்கு தாய் - சேய் நல அலுவலா் பதவி உயா்வு வழங்க வேண்டும் என்பன உள்ளிட்ட 9 அம்சக் கோரிக்கைகளை வலியுறுத்தி முழக்கங்கள் எழுப்பப்பட்டன.

இதில், மாவட்டத் தலைவா் தேவசேனா, மாவட்டச் செயலா் நவநீதம், மாவட்டப் பொருளாளா் கவிதா, மாவட்ட பிரசாரச் செயலா் வேளாங்கண்ணி உள்ளிட்ட நிா்வாகிகள் மற்றும் 200-க்கும் மேற்பட்ட சமுதாய சுகாதார செவிலியா்கள் கலந்துகொண்டனா்.