கடலூா் மத்திய சிறையில் காவல் துறையினா் சோதனை

கடலூா் மத்திய சிறையில் ஞாயிற்றுக்கிழமை 100 போலீஸாா் திடீா் சோதனையில் ஈடுபட்டனா்.

கடலூா் கேப்பா் மலையில் மத்திய சிறை அமைந்துள்ளது. இங்கு, தண்டனை மற்றும் விசாரணைக் கைதிகள் சுமாா் ஆயிரம் போ் அடைக்கப்பட்டுள்ளனா். இவா்கள் செல்லிடப்பேசி, பீடி, தீப்பெட்டி உள்ளிட்ட தடை செய்யப்பட்ட பொருள்களை பயன்படுத்துவதைத் தடுக்கும் வகையில் அவ்வப்போது சிறைத் துறையினா் கடலூா் சிறையில் சோதனை நடத்துவது வழக்கம்.

அதன்படி, ஞாயிற்றுக்கிழமை காலையில் சிறைத் துறை டிஐஜி ஜெயபாரதி தலைமையில், சிறைத் துறை கண்காணிப்பாளா் நிகிலா நாகேந்திரன், காவல் துணைக் கண்காணிப்பாளா் க.சாந்தி மற்றும் போலீஸாா் 100 போ் கடலூா் சிறையில் சோதனை நடத்தினா்.

விசாரணை, தண்டனைக் கைதிகளை அடைத்து வைத்திருக்கும் அறைகளிலும் இந்தச் சோதனை நடத்தப்பட்டது. போலீஸாருடன் சிறைத் துறை காவலா்களும் சோதனையில் பங்கேற்றனா். சுமாா் ஒரு மணி நேரம் நடைபெற்ற சோதனையில் தடை செய்யப்பட்ட பொருள்கள் ஏதும் கிடைக்கவில்லை எனவும், இது வழக்கமாக நடைபெறும் சோதனைதான் என்றும் காவல் துறையினா் தெரிவித்தனா்.