ரிஷிவந்தியம் தொகுதியில் ஹாட்ரிக் வெற்றி பெற்ற திமுக

கள்ளக்குறிச்சி மாவட்டம், ரிஷிவந்தியம் சட்டப்பேரவைத் தொகுதி திமுக வேட்பாளா் க.காா்த்திகேயன் தொடா்ந்து 3-ஆவது (ஹாட்ரிக்) முறையாக இத்தொகுதியில் வெற்றி பெற்றாா்.

ரிஷிவந்தியம் தொகுதியில் திமுக சாா்பில் க.காா்த்திகேயன் எம்எல்ஏ, பாமக சாா்பில் அ.ப.செழியன், தவெக சாா்பில் கோ.அசோக்குமாா், நாதக சாா்பில் ராதிகா உள்ளிட்ட 25 வேட்பாளா்கள்களத்தில் இருந்தனா்.

இத் தொகுதியில் 350 வாக்குச் சாவடி மையங்களில் 2,43,150 போ் வாக்களித்தனா். இந்திலி ஆா்.கே.எஸ்.கல்லூரியில் திங்கள்கிழமை காலை 8 மணிக்கு வாக்கு எண்ணும் பணி தொடங்கியது. இதில் தபால் வாக்குகள் 5 சுற்றுகளாக எண்ணப்பட்டன. மின்னணு வாக்குப் பதிவு இயந்திரத்தில் பதிவான வாக்குகள் 14 மேஜைகளில், 25 சுற்றுகளாக எண்ணப்பட்டன.

அதன்படி முதல் சுற்று முதல் 4-ஆவது சுற்று வரை திமுக வேட்பாளா் க.காா்த்திகேயன் முன்னிலை வகித்தாா். இதையடுத்து 5, 6-ஆவது சுற்றுகளில் தவெக வேட்பாளா் முன்னிலை வகித்தாா். பின்னா் 8-ஆவது சுற்றில் இருந்து 25-ஆவது சுற்று வரை திமுக வேட்பாளா் க.காா்த்திகேயன் முன்னிலை வகித்து, 4,862 வாக்கு வித்தியாசத்தில் வெற்றி பெற்றாா்.

வாக்கு எண்ணிக்கை விபரம்

க.காா்த்திகேயன் (திமுக) - 89,711

கோ.அசோக்குமாா் (தவெக) - 84,849

அ.ப.செழியன் (பாமக) - 56,488

ராதிகா (நாதக) - 7,247

இந்தத் தொகுதியில் தொடா்ந்து 3-ஆவது முறையாக திமுக வேட்பாளா் க.காா்த்திகேயன் வெற்றி பெற்றுள்ளாா் என்பது குறிப்பிடத்தக்கது.