கல்லூரி மாணவா்கள் கல்வி உதவித்தொகை பெற விண்ணப்பிக்கலாம்

கள்ளக்குறிச்சி மாவட்டத்தில் கல்லூரிகளில் படித்து வரும் இளநிலை, முதுநிலை மற்றும் ஆராய்ச்சி மாணவா்கள் பிரதரின் பள்ளி மேல்படிப்பு கல்வி உதவித்தொகை திட்டத்தின் கீழ் உதவித்தொகை பெற விண்ணப்பிக்கலாம் என ஆட்சியா் தெரிவித்துள்ளாா்.

இதுகுறித்து ஆட்சியா் ஜெ.இ.பத்மஜா வெளியிட்ட செய்திக்குறிப்பு:

கள்ளக்குறிச்சி மாவட்டத்தில் அரசு, அரசு உதவிபெறும் கல்வி நிறுவனங்கள் மற்றும் தனியாா் தொழில் கல்லூரிகளில் அரசு ஒதுக்கீட்டின் கீழ் பயிலும் பிற்படுத்தப்பட்ட, மிகப்பிற்படுத்தப்பட்ட மற்றும் சீா்மரபினா் மாணவ, மாணவிகளுக்கு 2026-2027-ஆம் ஆண்டுக்கான பிரதம மந்திரி பள்ளி மேல்படிப்பு கல்வி உதவித்தொகை திட்டம் பிற்படுத்தப்பட்டோா், மிகப்பிற்படுத்தப்பட்டோா் (ம) சிறுபான்மையினா் நலத் துறை மூலம் செயல்படுத்தப்பட்டு வருகிறது.

அரசு, அரசு உதவிபெறும் கலை மற்றும் அறிவியல் கல்லூரிகளில் மூன்றாண்டு இளங்கலை பட்டப்படிப்பு பயிலும் மாணவ, மாணவிகளுக்கு எவ்வித நிபந்தனையுமின்றி கல்வி உதவித்தொகை வழங்கப்படுகிறது. பாலிடெக்னிக், இளநிலை (தொழில்படிப்பு), முதுநிலை (ம) ஆராய்ச்சி படிப்பு மாணவா்களுக்கு குடும்ப ஆண்டு வருமானம் ரூ.2,50,000-க்கு மிகாமல் இருத்தல் வேண்டும்.

விண்ணப்பிக்கும் முறை: 2026-2027-ஆம் கல்வியாண்டில் இந்த கல்வி உதவித்தொகைத் திட்டத்துக்கான விண்ணப்பங்கள் இணையதளம் மூலம் பெறப்படுகின்றன. தகுதியுள்ள மாணவா்கள் தாங்கள் பயிலும் கல்லூரியில் கல்வி உதவித்தொகைக்கென உள்ள ஒருங்கிணைப்பு அலுவலரை அணுகி இணையதளம் மூலம் செப்.18 முதல் ஆக்.21-ஆம் தேதி வரை கல்வி உதவித்தொகைக்கு விண்ணப்பிக்கலாம் என தெரிவித்துக்கொள்ளப்படுகிறது. கல்வி உதவித்தொகை தொடா்பான சந்தேகங்களுக்கு மாவட்ட ஆட்சியா் அலுவலக வளாகத்தில் உள்ள மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலரை, அலுவலக நேரங்களில் அணுகி தொடா்பு கொள்ளலாம் என ஆட்சியா் தெரிவித்துள்ளாா்.