மார்ச் 6-இல் திருநள்ளாறில் நாட்டியாஞ்சலி விழா தொடக்கம்

திருநள்ளாறு ஸ்ரீ தர்பாரண்யேஸ்வரர் கோயில் நிர்வாகம் சார்பில் 5 நாள்கள் நாட்டியாஞ்சலி நிகழ்ச்சி வரும் 6-ஆம் தேதி தொடங்குகிறது. உலகப் புகழ்பெற்ற பரதநாட்டியக் கலைஞர்கள் பலர் இதில் பங்கேற்கவுள்ளனர்.

இக்கோயில் சார்பில் ஆண்டுதோறும் மகா சிவராத்திரி விழா கொண்டாடப்படுகிறது. 11-ஆம் ஆண்டாக நாட்டியாஞ்சலி நிகழ்ச்சி வரும் 6-ஆம் தேதி முதல் 10-ஆம் தேதி வரை நடைபெறுகிறது.

வழக்கமாக கோயில் வளாகத்தில் உள்ள மண்டபத்தில் நடைபெற்றுவந்த நாட்டியாஞ்சலி நிகழ்ச்சி நிகழாண்டு  வரிசை வளாகத்தில் (கியூ காம்ப்ளக்ஸ்) உள்ள மண்டபத்தில் நடைபெறவுள்ளது.

முதல்நாள் நிகழ்ச்சி 6-ஆம் தேதி ஞாயிற்றுக்கிழமை மாலை 6 மணிக்கு மங்கள இசையுடன் தொடங்குகிறது. இரவு 8.30 மணியளவில் பத்மாசுப்ரமணியம் குழுவினர் பங்கேற்கும் மோகினியாட்டம் நடைபெறுகிறது.

தொடர்ந்து ஜப்பான், கனடா, மலேசியா உள்ளிட்ட பல்வேறு நாடுகளில் பரத நாட்டியமாடி புகழ்பெற்றக் கலைஞர்கள் பங்கேற்று நடனமாடவுள்ளனர்.

ஏறக்குறைய ஆயிரம் கலைஞர்கள் இந்த 5 நாள் நாட்டியாஞ்சலியில் பங்கேற்பர். காரைக்கால், தமிழகத்தின் பல்வேறு பகுதிகளில் சிறந்து விளங்கும் நாட்டியக் கலைஞர்களும் இதில் பங்கேற்கின்றனர். தினமும் மாலை 6 மணிக்குத் தொடங்கி இரவு 10 மணி வரை நாட்டியாஞ்சலி நிகழ்ச்சி நடைபெறும். பக்தர்கள் இதைக் காணும் வகையில் இருக்கைகள் அமைக்கப்படும் எனக் கோயில் நிர்வாகத்தினர் வியாழக்கிழமை தெரிவித்தனர்.