மருத்துவமனையில் நோயாளி தற்கொலை

புதுவை மாநிலம் மதகடிப்பட்டில் உள்ள தனியார் மருத்துவமனையில் நோயாளி தற்கொலை செய்து கொண்ட சம்பவம் தொடர்பாக போலீஸார் விசாரித்து வருகின்றனர்.
 புதுவை மாநிலம் திருபுவனை அருகே தமிழகப் பகுதியான சேழாங்கனூர் மாரியம்மன் கோயில் தெருவைச் சேர்ந்தவர் ராமலிங்கம். இவரது மனைவி சரசு. இவர்களுக்கு வரதன் என்ற ஒரு மகனும், ஒரு மகளும் உள்ளனர். ராமலிங்கம் கடந்த ஓராண்டுக்கு முன்பு இறந்துவிட்டார். இந்த நிலையில், சரசுக்கு கடந்த ஒரு வாரத்துக்கு முன்பு உடல் நிலை பாதிக்கப்பட்டதாம். இதையடுத்து, அவரை மதகடிப்பட்டில் உள்ள தனியார் மருத்துவக் கல்லூரி மருத்துவமனையில் சேர்த்தனர். அவரை வரதன் உடனிருந்து கவனித்து வந்தாராம்.
 இந்த நிலையில், சனிக்கிழமை மருத்துவமனையில் உள்ள கழிப்பறைக்குச் செல்வதாக கூறிச் சென்ற சரசு நீண்ட நேரமாகியும் வரவில்லையாம்.
 இதனால் சந்தேகமடைந்த வரதன் அங்கிருந்த செவிலியரிடம் கழிப்பறைக்குச் சென்று பார்க்கும்படி கூறினாராம். அங்கு சென்று பார்த்த போது, சரசு தான் அணிந்திருந்த சேலையால் கதவின் தாழ்ப்பாளில் தூக்கிட்டபடி கிடந்தாராம்.
 இதுகுறித்து வரதன் திருபுவனை காவல் நிலையத்தில் புகார் அளித்தார்.
 அதன் பேரில், காவல் உதவி ஆய்வாளர் பிரியா தலைமையிலான போலீஸார் சம்பவ இடத்துக்கு வந்து சடலத்தைக் கைப்பற்றி பிரேத பரிசோதனைக்காக கதிர்காமம் அரசு மருத்துவக் கல்லூரி மருத்துவமனைக்கு அனுப்பி வைத்தனர். மேலும், வழக்குப் பதிவு செய்து விசாரித்து வருகின்றனர்.