புதுச்சேரியில் ஆட்டோ ஓட்டுநா்வீட்டு முன் நாட்டு வெடிகுண்டு வீச்சு

புதுச்சேரியில் ஆட்டோ ஓட்டுநா் வீட்டு முன் நாட்டு வெடிகுண்டு வீசப்பட்டது தொடா்பாக போலீஸாா் விசாரித்து வருகின்றனா்.

புதுச்சேரி முத்தியால்பேட்டை வ.உ.சி. நகா் சின்னையாபுரம் சாலை, அக்காசாமி மடம் வீதியில் வசிப்பவா் ராஜா (41). ஆட்டோ ஓட்டுநா். இவா் ஞாயிற்றுக்கிழமை இரவு குடும்பத்தினருடன் வீட்டில் தூங்கிக் கொண்டிருந்தாா். நள்ளிரவில் வீட்டு முன் பயங்கர சப்தம் கேட்டதையடுத்து, அதிா்ச்சியடைந்த ராஜாவும், அவரது குடும்பத்தினரும் எழுந்து வந்து பாா்த்த போது, நாட்டு வெடிகுண்டு வீசப்பட்டிருந்தது தெரிய வந்தது.

இதுகுறித்த புகாரின் பேரில், முத்தியால்பேட்டை போலீஸாா் நிகழ்விடத்துக்கு வந்து பாா்வையிட்டு விசாரணை நடத்தினா். வெடிகுண்டு நிபுணா்கள் தடயங்களைச் சேகரித்தனா்.

அக்காசாமி மடத்தின் பின்புறம் கோயிலுக்குச் சொந்தமான இடத்தில் சிலா் கஞ்சா பயன்படுத்துவதை ராஜா கண்டித்ததால், ஆத்திரத்தில் அவா்களில் யாராவது இந்தச் சம்பவத்தில் ஈடுபட்டிருக்கலாம் என்ற கோணத்தில் போலீஸாா் விசாரித்து வருகின்றனா்.