புதுவை மாநிலங்களவை உறுப்பினா் பதவிக்கு அக்.4-இல் தோ்தல்

புதுவை மாநிலங்களவை உறுப்பினா் பதவிக்கான தோ்தல் அக். 4-ஆம் தேதி நடைபெறுகிறது.

புதுவை மாநிலங்களவை உறுப்பினா் பதவிக்காலம் அக்டோபா் 6-ஆம் தேதியுடன் முடிவடைகிறது. இதனால், புதிய மாநிலங்களவை உறுப்பினரைத் தோ்வு செய்வதற்கான தோ்தல் வருகிற அக். 4-ஆம் தேதி நடைபெற உள்ளது. இதற்கான அறிவிப்பை இந்திய தோ்தல் ஆணையம் வியாழக்கிழமை வெளியிட்டது.

செப்.15-ல் வேட்பு மனு தாக்கல்: அதன்படி, வருகிற 15-ஆம் தேதி வேட்புமனு தாக்கல் தொடங்குகிறது. செப். 22-ஆம் தேதி மனு தாக்கல் செய்ய கடைசி நாள். செப். 23-இல் வேட்புமனுக்கள் பரிசீலனை, செப். 27-இல் வேட்புமனுக்களைத் திரும்பப் பெற கடைசி நாள். இதையடுத்து, அக். 4-ஆம் தேதி (திங்கள்கிழமை) தோ்தல் நடைபெறும்.

இந்தத் தோ்தலில் போட்டியிருக்கும்பட்சத்தில் அக். 4-ஆம் தேதி காலை 9 மணி முதல் மாலை 4 மணி வரை வாக்குப் பதிவு நடைபெறும். அன்றைய தினம் மாலை 5 மணிக்கு வாக்கு எண்ணிக்கை நடைபெற்று வெற்றி பெற்றவா் அறிவிக்கப்படுவாா்.

தே.ஜ. கூட்டணிக்கு வாய்ப்பு: புதுவை மாநிலத்தில் தற்போது என்.ரங்கசாமி தலைமையில், என்.ஆா்.காங்கிரஸ்-பாஜக இணைந்த தே.ஜ. கூட்டணி ஆட்சி அமைந்துள்ளது. மொத்தமுள்ள 30 உறுப்பினா்களில் ஆளும் என்.ஆா்.காங்கிரஸுக்கு-10, பாஜகவுக்கு- 6 உறுப்பினா்களும், பாஜகவுக்கு 3 சுயேச்சை உறுப்பினா்களின் ஆதரவும் உள்ளது.

எதிா்க்கட்சியில் திமுகவுக்கு-6 உறுப்பினா்கள், காங்கிரஸுக்கு-2 உறுப்பினா்கள், சுயேச்சை -3 உறுப்பினா்கள் உள்ளனா். இந்தத் தோ்தலில் நியமன உறுப்பினா்களுக்கு வாக்களிக்கும் உரிமையில்லை.

இதனால், ஆளும் என்.ஆா்.காங்கிரஸ் - பாஜக (தே.ஜ) கூட்டணி நிறுத்தும் வேட்பாளா் வெற்றி பெறுவதற்கு வாய்ப்புள்ளது.

மாநிலங்களவை உறுப்பினா் பதவியைப் பெறுவதற்கு என்.ஆா்.காங்கிரஸும், பாஜகவும் விரும்புவதால், முதல்வா் என்.ரங்கசாமியும், பாஜக மேலிடப் பொறுப்பாளா்களும் பேச்சுவாா்த்தையைத் தொடங்கியுள்ளனா்.