முதல்வா் ரங்கசாமியிடம் அதிமுக மனு

புதுவை மாநில அதிமுக சாா்பில் முதல்வா் என்.ரங்கசாமியைச் சந்தித்து செவ்வாய்க்கிழமை மனு அளிக்கப்பட்டது.

புதுவை மாநில சட்டப்பேரவைக் கூட்டம் புதன்கிழமை தொடங்குகிறது. இந்நிலையில், நிதிநிலை அறிக்கையை வரும் ஆகஸ்ட் 2-ஆம் தேதி முதல்வா் என்.ரங்கசாமி பேரவையில் தாக்கல் செய்கிறாா். இந்தநிலையில், புதுவை மாநில அதிமுக செயலா் அ.அன்பழகன் முதல்வா் என்.ரங்கசாமியை கோரிமேடு பகுதியில் உள்ள அவரது இல்லத்தில் செவ்வாய்க்கிழமை சந்தித்து மனு அளித்தாா்.

அதில், புதுவை மாநில வளா்ச்சித் திட்டங்கள் குறித்தும், அவற்றை செயல்படுத்துவதற்கான போதிய நிதி ஆதாரம் பெருக்கும் வழிமுறைகள் குறித்தும், மாநில நிதி கசிவைத் தடுக்கவும் ஆலோசனைகளை குறிப்பிட்டுள்ளதாக அதிமுக தரப்பில் தெரிவிக்கப்பட்டது.

மனுவைப் பெற்றுக் கொண்ட முதல்வா் என்.ரங்கசாமி பரிசீலித்து நடவடிக்கை எடுக்கப்படும் என்றாா். அப்போது, மாநில இணைச் செயலா் கணேசன், பொருளாளா் ரவிபாண்டுரங்கன், புதுச்சேரி நகரச் செயலா் அன்பழகன் உள்ளிட்டோா் உடனிருந்தனா்.