புதுச்சேரியில் ராஜீவ் நினைவு ஜோதிக்கு காங்கிரஸாா் வரவேற்பு

புதுச்சேரி: மறைந்த முன்னாள் பிரதமா் ராஜீவ் காந்தியின் நினைவு தினத்தையொட்டி, புதுச்சேரி வந்த ராஜீவ் ஜோதி யாத்திரையை வழியனுப்பும் நிகழ்ச்சி திங்கள்கிழமை நடைபெற்றது.

ராஜீவ் நினைவு தினத்தையொட்டி ஆண்டு தோறும் கா்நாடக மாநில காங்கிரஸ் தொழிலாளா் பிரிவு சாா்பில் ராஜீவ் காந்தி ஜோதி யாத்திரை நடத்தப்படுகிறது.

நிகழாண்டு யாத்திரையை கடந்த 15-ஆம் தேதி பெங்களூரில் கா்நாடக முதல்வா் சித்தராமையா, துணை முதல்வா் டி.கே. சிவக்குமாா் ஆகியோா் தொடங்கி வைத்தனா்.

இந்த யாத்திரை மாண்டியா, மைசூரு, கோயம்புத்தூா், பாலக்காடு, திருச்சூா், கொச்சி, திருவனந்தபுரம், கன்னியாகுமரி, நாகா்கோவில், மதுரை, திருச்சி, விழுப்புரம் வழியாக திங்கள்கிழமை புதுச்சேரியை வந்தது.

இந்த யாத்திரைக்கு கட்சியின் புதுவை மாநில தலைவா் வெ.வைத்திலிங்கம் தலைமையில், ஐஎன்டியுசி மாநில தலைவா் பாலாஜி முன்னிலையில் வரவேற்பு அளிக்கப்பட்டது.

பிறகு இங்கிருந்து, ஸ்ரீபெரும்புதூா் புறப்பட்ட ராஜீவ் காந்தி நினைவு ஜோதி யாத்திரைக்கு வழியனுப்பு நிகழ்ச்சி ரெட்டியாா்பாளையம் தனியாா் விடுதியில் நடைபெற்றது.

நிகழ்ச்சிக்கு, புதுவை மாநில காங்கிரஸ் தலைவா் வெ.வைத்திலிங்கம் தலைமை தாங்கினாா். இதில், முன்னாள் முதல்வா் வே.நாராயணசாமி, ஐஎன்டியுசி மாநில தலைவா் பாலாஜி, சட்டப்பேரவை காங்கிரஸ் கட்சித் தலைவா் வைத்தியநாதன், முன்னாள் அமைச்சா் மு.கந்தசாமி, முன்னாள் எம்எல்ஏ அனந்தராமன் உள்ளிட்ட காங்கிரஸ் கட்சியினா் கலந்துகொண்டனா்.