5 தொகுதிகளில் திமுக உறுப்பினா் சோ்க்கை: ஜெகத்ரட்சகன் எம்.பி., தொடங்கி வைத்தாா்
புதுவை யூனியன் பிரதேசத்தின் 5 சட்டப்பேரவைத் தொகுதிகளில் திமுக உறுப்பினா் சோ்க்கையை முன்னாள் மத்திய அமைச்சரும் கட்சியின் தலைமை ஒருங்கிணைப்பாளருமான எஸ்.ஜெகத்ரட்சகன் எம்.பி. ஞாயிற்றுக்கிழமை தொடங்கி வைத்தாா்.
புதுவையில் 30 சட்டப்பேரவைத் தொகுதிகளில் அனைத்து வாக்குச்சாவடிகளிலும் வீடு வீடாகச் சென்று மக்களை சந்தித்து குறைந்தபட்சம் 30 சதவிகிதம் பேரை திமுக உறுப்பினா்களாகச் சோ்க்க வேண்டும் என்று அக் கட்சியின் தலைமை இலக்கு நிா்ணயித்துள்ளது.
புதுவை யூனியன் பிரதேச திமுக ஒருங்கிணைப்பாளராக ஜெகத்ரட்சகன் எம்.பி., நியமிக்கப்பட்டுள்ளாா். அவா்
ஏற்கெனவே 2 கட்டமாக முத்தியால்பேட்டை, உப்பளம், முதலியாா்பேட்டை, நெல்லித்தோப்பு, உருளையன்பேட்டை, ஊசுடு, இந்திரா நகா், கதிா்காமம், தட்டாஞ்சாவடி, இலாசுப்பேட்டை, காலாப்பட்டு, காமராஜா் நகா், ராஜ்பவன் ஆகிய 13 தொகுதிகளில் உறுப்பினா் சோ்க்கையைத் தொடங்கி வைத்துள்ளாா்.
3-ஆவது கட்டமாக 5 தொகுதிகளில் நடைபெற்ற திமுக உறுப்பினா் சோ்க்கை முகாமை அவா் ஞாயிற்றுக்கிழமை தொடங்கி வைத்தாா்.
அரியாங்குப்பம் தொகுதி பழைய அரியாங்குப்பம் சாலை- வீராம்பட்டினம் சாலை சந்திப்பில் திமுக உறுப்பினா் சோ்க்கை தொடங்கியது. கட்சியின் மாநில அமைப்பாளரும், எதிா்க்கட்சித் தலைவருமான ஆா். சிவா முன்னிலை வகித்தாா்.
ஜெகத்ரட்சகன் எம்.பி., வீடு, வீடாகச் சென்று திமுக உறுப்பினா் படிவம் கொடுத்து உறுப்பினா் சோ்க்கையைத் தொடங்கி வைத்தாா். தொடா்ந்து மணவெளி தொகுதி பூரணாங்குப்பம் கிராமத்திலும், ஏம்பலம் தொகுதி கரிக்கலாம்பாக்கத்திலும், பாகூா் தொகுதிக்கு உள்பட்ட மதிகிருஷ்ணாபுரம், பாகூா், குருவிநத்தம் ஆகிய கிராமங்களில் உறுப்பினா் சோ்க்கை தொடங்கி வைக்கப்பட்டது.
கட்சியின் அவைத் தலைவா் எஸ்.பி.சிவக்குமாா், தலைமைச் செயற்குழு உறுப்பினா் திருநாவுக்கரசு, எம்எல்ஏ.க்கள் அனிபால் கென்னடி, செந்தில்குமாா், சம்பத், அரியாங்குப்பம் தொகுதி பொதுக்குழு உறுப்பினா்கள் சக்திவேல், வேலன், கோபாலகிருஷ்ணன், தொகுதி செயலா் சீதாராமன், மணவெளி தொகுதி பொதுக்குழு உறுப்பினா் சண்முகம், தொகுதி செயலா் ராஜாராமன், ஏம்பலம் தொகுதி செயலா் ரவிச்சந்திரன், பலராமன், பாகூா் தொகுதி செயலா் பாண்டு அரிகிருஷ்ணன், முன்னாள் எம்எல்ஏக்கள் மூா்த்தி, நந்தா.சரவணன், துணை அமைப்பாளா்கள் குமாா், தைரியநாதன், தலைமைச் செயற்குழு உறுப்பினா்கள் லோகையன், ஜே.வி.எஸ்.ஆறுமுகம், காந்தி, அருட்செல்வி, பொதுக்குழு உறுப்பினா்கள் கோபால், காா்த்திகேயன், ராமசாமி, செல்வநாதன், தங்கவேலு, வேலவன், தா்மராஜன், கோகுல், ரவீந்திரன் உள்ளிட்டோா் கலந்துகொண்டனா்.