குழந்தைகளிடம் அதிகரிக்கும் டைப் 1 நீரிழிவு: புதுச்சேரி ஜிப்மா் எச்சரிக்கை

குழந்தைகளிடம் டைப் 1 நீரிழிவு நோய் அதிகரித்து வருவதாக ஜிப்மா் மருத்துவ நிா்வாகம் எச்சரித்துள்ளது.

ஜிப்மரின் குழந்தை மருத்துவத் துறை டைப்-1 நீரிழிவு கொண்ட குழந்தைகள் மற்றும் பராமரிப்பாளா்களுக்கான சிறப்பு விழிப்புணா்வு மற்றும் சுகாதார கல்வி நிகழ்ச்சியை அண்மையில் நடத்தியது.

ஜிப்மா் குழந்தை நல மருத்துவத் துறை பேராசிரியா் மருத்துவா் தில்லி குமாா் தலைமை தாங்கினாா். இந்த நிகழ்ச்சியில் குழந்தைகள் மற்றும் பெற்றோா் கலந்து கொண்டு, தினசரி மேலாண்மைக்குத் தேவையான அறிவு திறன்களைப் பெற்றனா்.

வயது வந்தவா்களில் பொதுவாக காணப்படும் டைப் 2 நீரிழிவிலிருந்து மாறுபட்டு, டைப் 1 நீரிழிவு என்பது உடலின் நோய் எதிா்ப்பு அமைப்பு இன்சுலின் உற்பத்தியை முழுமையாக பாதிக்கும் ஒரு தன்னைத் தாக்கும் நோயாகும். இது குழந்தைகளிடம் அதிகம் காணப்படுவதாக தெரிவிக்கப்பட்டது.

இது பெரும்பாலும் குழந்தைகள் மற்றும் இளம் வயதினரைக் பாதிக்கிறது. காரணமறியாத உடல் எடை குறைவு, அடிக்கடி சிறுநீா் கழித்தல், அதிக தாகம், சோா்வு போன்ற ஆரம்ப அறிகுறிகளைக் கவனிக்காமல் விட்டால், உயிருக்கு ஆபத்தான அவசர நிலைக்கு விரைவாக மாறக்கூடும் என்றும் ஜிப்மா் நிபுணா்கள் எச்சரிக்கின்றனா்.

இந்த நிகழ்ச்சியை மருத்துவா் மிதிலேஷ் ஒருங்கிணைத்து, நிபுணா்களுடன் இணைந்து செயல்பட்டாா்.

நிகழ்ச்சியின் முக்கிய அம்சமாக, ஜிப்மா் செவிலியா் அதிகாரி பரிமளா தனது அனுபவத்தை பகிா்ந்து கொண்டாா். டைப் 1 நீரிழிவு கொண்ட குழந்தையின் தாயான அவா், இன்சுலின் செலுத்துதல், ரத்த சா்க்கரை அளவைக் கண்காணித்தல், குறைந்த, அதிக சா்க்கரை அறிகுறிகளை அடையாளம் காணுதல் மற்றும் குடும்பத்தில் ஏற்படும் உணா்ச்சி மற்றும் நடைமுறை சவால்களைச் சமாளிக்கும் வழிகளை விளக்கினாா்.

உணவு தொடா்பான வழிகாட்டுதலை மருத்துவா் மிலன் முகம்மது வழங்கினாா். சமநிலையான உணவு, காா்போ ஹைட்ரேட் கணக்கீடு மற்றும் குழந்தைகளுக்கான உணவு குறித்த தவறான நம்பிக்கைகளைத் தெளிவுபடுத்தினாா். மனநல சவால்கள் குறித்து உளவியல் நிபுணா் அகில் மனஅழுத்த மேலாண்மை மற்றும் நோ்மறையான வாழ்க்கை அணுகுமுறை குறித்து பேசினாா்.

மேலும், நான்ஸி பிரேம்குமாா் டைப் 1 நீரிழிவு பாதிப்பு கொண்ட பள்ளி மாணவா்கள் எதிா்கொள்ளும் சவால்கள், தோ்வின்போது சா்க்கரை பரிசோதனை கருவி மற்றும் சிற்றுண்டி எடுத்துச் செல்ல அனுமதி போன்ற அரசின் அனுமதிகள் குறித்து விளக்கினாா். இன்சுலின், சா்க்கரை பரிசோதனை கருவி ஆகியவற்றின் செலவுகளுக்கு உதவும் தன்னாா்வ அமைப்புகள் பற்றியும் அவா் தகவல் பகிா்ந்தாா்.

முடிவில், பெற்றோா், ஆசிரியா்கள் மற்றும் பொதுமக்கள் மத்தியில் விழிப்புணா்வு அதிகரிப்பது மிகவும் அவசியம் என்று ஏற்பாட்டுக் குழு வலியுறுத்தியது. ஆரம்ப கட்டத்தில் நோயை அடையாளம் கண்டு சரியான சிகிச்சை அளித்தால், குழந்தைகளின் வாழ்க்கைத் தரம் மற்றும் எதிா்காலம் குறிப்பிடத்தக்க அளவில் மேம்படும் என அவா்கள் தெரிவித்தனா்.