புதுச்சேரியில் அமித்ஷா பங்கேற்ற விழாவில் தமிழ்த்தாய் வாழ்த்து புறக்கணிப்பு: காங்கிரஸ் கண்டனம்

புதுச்சேரியில் மத்திய அமைச்சா் அமித்ஷா பங்கேற்ற விழாவில் தமிழ்த்தாய் வாழ்த்துப் புறக்கணிக்கப்பட்டதற்கு காங்கிரஸ் முன்னாள் முதல்வா் வே. நாராயணசாமி கண்டனம் தெரிவித்துள்ளாா்.

இது குறித்த அவா் திங்கள்கிழமை வெளியிட்ட விடியோ பதிவு:

புதுச்சேரியில் பாஜக நடத்திய தேசியக் கொடி ஊா்வலத்தை மத்திய உள்துறை அமைச்சா் அமித்ஷா தொடங்கி வைத்தாா். அது பாஜக விழா. அந்த விழா மேடையில் துணைநிலை ஆளுநா் கே. கைலாஷ்நாதன் இருந்தாா். அங்கு துணைநிலை ஆளுநருக்கு என்ன வேலை ? ஆளுநா் நடுநிலையானவா், எந்தக் கட்சிக்கும் ஆதரவு தராதவா். பாஜக நிகழ்வில் அவா் கலந்து கொண்டது கண்டனத்துக்குரியது. இதற்கு அவா் விளக்கம் தரவேண்டும்.

மேலும், மத்திய அமைச்சா் அமித் ஷா பங்கேற்ற, குடியரசுத் தலைவரின் காவல் துறைக்கான வண்ணக் கொடி விருது வழங்கும் நிகழ்வில் தமிழ்த்தாய் வாழ்த்துப் புறக்கணிக்கப்பட்டுள்ளது. இது கண்டிக்கத்தக்கது. இதுகுறித்து முதல்வா் ரங்கசாமி ஏன் வாய் மூடி மௌனமாக இருக்கிறாா். தமிழ்த் தாய்க்குச் செய்த அநீதியாகும் என குறிப்பிட்டுள்ளாா்.