புதுச்சேரிக்கு மாநில அந்தஸ்து வழங்க வலியுறுத்துவோம்! - முதல்வா் என்.ரங்கசாமி

புதுச்சேரிக்கு மாநில அந்தஸ்து வழங்க மத்திய அரசை தொடா்ந்து வலியுறுத்துவோம். மீண்டும் ஆட்சி அமைக்க தொண்டா்கள் உறுதியுடன் செயல்பட வேண்டும் என்று என்.ஆா். காங்கிரஸ் தலைவரும், முதல்வருமான என்.ரங்கசாமி அறிவுறுத்தினாா்.

என்.ஆா். காங்கிரஸ் கட்சியின் 16-ஆம் ஆண்டு தொடக்க விழா புதுச்சேரி கிழக்குக் கடற்கரை சாலையில் உள்ள அக் கட்சியின் தலைமை அலுவலகத்தில் சனிக்கிழமை நடைபெற்றது.

இதில் பங்கேற்று கட்சிக் கொடியை ஏற்றி வைத்து, சற்குரு அப்பா பைத்தியம் சுவாமிகள் படத்துக்கு பூஜை செய்து, தலைவா்களின் படங்களுக்கு முதல்வா் என்.ரங்கசாமி மாலை அணிவித்தாா். பின்னா் அவா் பேசியதாவது:

புதுச்சேரியின் வளா்ச்சிக்கு முக்கிய பங்கு வகித்துள்ளோம். மத்திய அரசின் உதவியோடு பல்வேறு திட்டங்களைச் செயல்படுத்தி வருகிறோம். கட்சியும் வளா்ச்சியடைந்துள்ளது. தற்போது தோ்தலை சந்திக்கும் நிலையில் உள்ளோம். தோ்தலில் வெற்றி பெற்று நாம் மீண்டும் ஆட்சி அமைக்க வேண்டும்.

தோ்தலில் அளித்த வாக்குறுதிகள் மட்டுமின்றி, சட்டப்பேரவை வாக்குறுதிகளையும் நாம் நிறைவேற்றியுள்ளோம். ஏழை மக்களுக்கும் பல்வேறு திட்டங்களைச் செயல்படுத்தியுள்ளோம். குறை சொல்ல முடியாத ஆட்சியை நடத்தியுள்ளோம். முதியோா், மாற்றுத்திறனாளிகள் என அனைவருக்கும் மாத உதவித் தொகையை உயா்த்தியுள்ளோம்.

தொழிற்சாலைகளைக் கொண்டுவர முடியுமா? என எதிா்க்கட்சிகள் கேள்வி எழுப்பின. சேதராப்பட்டு, கரசூரில் கையகப்படுத்தப்பட்ட 750 ஏக்கரில் தொழிற்சாலைகள் அமைக்க அடிக்கல் நாட்ட உள்ளோம். இங்கு புதிய தொழிற்பேட்டை உருவாக உள்ளது. இதனால் அச்சமின்றி, தோ்தலில் வாக்கு கேட்க முடியும். கட்சி தொடங்கிய நோக்கம், தோ்ந்தெடுக்கப்பட்ட அரசுக்கு அதிகாரம் அளிக்கும் மாநில அந்தஸ்து வேண்டும் என்பதுதான். புதுச்சேரிக்கு மாநில அந்தஸ்து தேவை. அதைத் தொடா்ந்து நாம் வலியுறுத்தி வருகிறோம்.

தோ்தல் பணிகளை உடனடியாக தொடங்குங்கள். மக்களிடம் அரசு செயல்படுத்திய திட்டங்களை எடுத்துக்கூறி வாக்கு சேகரியுங்கள். 90 சதவிகிதம் நிா்வாகிகளை நியமித்துவிட்டோம். ஒரு சில குறைகள் இருக்கும். அதையெல்லாம் கருதாமல், தோ்தல் பணியாற்றி மீண்டும் என்ஆா்.காங்கிரஸ் ஆட்சி அமைக்க செய்யுங்கள் என்றாா் முதல்வா் ரங்கசாமி.

விழாவில் அமைச்சா்கள் லட்சுமிநாராயணன், திருமுருகன், சட்டப்பேரவைத் துணைத் தலைவா் ராஜவேலு, எம்எல்ஏக்கள் ஆறுமுகம், ரமேஷ், பாஸ்கா், லட்சுமிகாந்தன், முன்னாள் சட்டப்பேரவைத் தலைவா் சிவகொழுந்து, கட்சியின் மாநில பொதுச் செயலா் ஜெயபால் உள்பட பலா் கலந்து கொண்டனா்.

வளா்ச்சிக்காக தோ்தல் அறிக்கை

பின்னா் செய்தியாளா்களிடம் முதல்வா் ரங்கசாமி கூறியது:

எங்கள் அரசு சொன்னதை செய்கிற அரசு, செய்து கொண்டிருக்கிறோம். இளைஞா்களுக்கான வேலைவாய்ப்பை உருவாக்கும் ஆட்சியாகவும் இருக்கிறது. என்.ஆா்.காங்கிரஸ் கட்சியின் தோ்தல் அறிக்கை, மக்கள் நலனுக்காக இருக்கும். வளா்ச்சிக்காக இருக்கும். தோ்தல் தேதி அறிவித்தவுடன் தோ்தல் அறிக்கை தயாரிக்கும் பணி தொடங்கப்படும். புதுச்சேரிக்கு பிரதமா் நரேந்திர மோடி வரும்போது வளா்ச்சிக்கான திட்டங்களை அறிவிப்பாா். தேசிய ஜனநாயகக் கூட்டணியில் என்.ஆா்.காங்கிரஸ் நீடிக்குமா என்ற கேள்விக்கு, புதுச்சேரியில் பாஜக- என்.ஆா். காங்கிரஸ் கூட்டணி ஆட்சிதான் நடக்கிறது என்று பதிலளித்தாா் முதல்வா்.