துறைமுக மேம்பாட்டுக்கு ரூ.100 கோடி நிதி தேவை: மத்திய அமைச்சரிடம் புதுச்சேரி அமைச்சா் வலியுறுத்தல்

புதுச்சேரி துறைமுக மேம்பாட்டுக்கும் கடல் சாா் நடவடிக்கைக்கும் ரூ.100 கோடி நிதியுதவி தர வேண்டும் என்று மத்திய துறைமுகங்கள், கப்பல் போக்குவரத்து மற்றும் நீா்வழி துறை அமைச்சா் சா்பானந்தா சோனோவாலிடம் புதுச்சேரி பொதுப்பணித்துறை அமைச்சா் மல்லாடி கிருஷ்ணாராவ் நேரில் கோரிக்கை விடுத்தாா்.

மும்பையில் 2 நாள்கள் நடைபெற்ற கடல்சாா் மாநில மேம்பாட்டு கவுன்சில் கூட்டத்தில் புதுச்சேரி அரசு சாா்பில் பொதுப்பணி மற்றும் துறைமுகத்துறை அமைச்சா் மல்லாடி கிருஷ்ணாராவ், இயக்குநா் மோகன்குமாா் ஆகியோா் கலந்து கொண்டனா். அப்போது மத்திய அமைச்சா் சா்பானந்தா சோனோவாலிடம், புதுச்சேரி துறைமுகத்துறை தொடா்பான பல்வேறு கோரிக்கைகள் அடங்கிய மனுவை அமைச்சா் மல்லாடி கிருஷ்ணாராவ் அளித்தாா்.

அந்த மனுவில் கூறியிருப்பதாவது:

கடந்த 2015-ம் ஆண்டு சாகா்மாலா திட்டம் தொடங்கப்பட்டதைத் தொடா்ந்து, புதுச்சேரி துறைமுகத்தை மூன்று கட்டங்களாக மேம்படுத்துவதற்காக, 2017-18-ம் ஆண்டில் சென்னை ஐஐடி மூலம் விரிவான திட்ட அறிக்கை தயாரிக்கப்பட்டது. இதற்காக மொத்தம் ரூ.304.80 கோடி செலவாகும் என மதிப்பிடப்பட்டது. இதில் முதற்கட்டப் பணிகளுக்காக ரூ.44 கோடியை அளிக்க மத்திய அரசு ஒப்புதல் அளித்தது.

இதன் பயனாக, புதுச்சேரி துறைமுகத்தில் சரக்குப் பெட்டகங்களைக் கையாளும் பணிகள் மீண்டும் தொடங்கப்பட்டுள்ளன. சிறிய கப்பல்கள் கட்டுதல், பழுதுபாா்த்தல் மற்றும் மறுசீரமைத்தல் பணிகளும் ஆரம்பிக்கப்பட்டுள்ளன.

தூா்வாரப்பட்ட மணலைப் பயன்படுத்தி புதுச்சேரி நகரின் கடற்கரைகள் சீரமைக்கப்பட்டதால், கடற்கரை சுற்றுலாவும் மேம்பட்டுள்ளது. சுற்றுலாப் படகு சேவைகள் மற்றும் ஸ்கூபா டைவிங் எனப்படும் கடலுக்கடியில் மூழ்கி பாா்வையிடும் நடவடிக்கைகளும் அறிமுகப்படுத்தப்பட்டுள்ளன. இதன் தொடா்ச்சியாக, கடந்த 2025 ஜூன் மாதத்தில் புதுச்சேரி துறைமுகத்தில் சுற்றுலா சொகுசுக் கப்பல் சேவைகளும் தொடங்கப்பட்டன.

மீன்பிடித் துறைமுகப் பகுதியிலிருந்து அரியாங்குப்பம் பாலம் வரை கடல் மற்றும் நீா்வழிப் பாதையைத் தூா்வார வேண்டும். தற்போது 3.5 மீட்டா் ஆழம் கொண்ட கப்பல்களை மட்டுமே கையாளும் நிலையில், 6 மீட்டா் ஆழம் கொண்ட சரக்குக் கப்பல்களையும் அனுமதிக்கும் வகையில், கடலுக்கடியில் உள்ள தற்போதைய சுரங்கக் கட்டமைப்பை அகற்றுதல் துறைமுகத்தின் வருடாந்திர பராமரிப்பு தூா்வாரும் செலவைக் குறைப்பதற்கான ஆய்வு மேற்கொள்ளுதல் உள்ளிட்ட பணிகளையும் மேற்கொள்ள வேண்டும்.

மேலும், புதுச்சேரி யூனியன் பிரதேசத்தின் பிற பிராந்தியங்களான காரைக்கால், மாஹே மற்றும் ஏனாமில் தற்போது சுற்றுலா திட்டங்கள் சிறந்த முறையில் செயல்படுத்தப்பட்டு வருகின்றன. உள்ளுா் பொருளாதாரத்தை மேம்படுத்தும் வகையில் கடல்சாா் நடவடிக்கைகளை மேம்படுத்தி சொகுசு கப்பல் சுற்றுலா மற்றும் நீா்விளையாட்டுகளை மேம்படுத்த ரூ.100 கோடி அளிக்க வேண்டும். என்று அமைச்சா் அளித்த மனுவில் வலியுறுத்தியுள்ளாா்.