மீன்பிடி வலையில் சிக்கிய பிளாஸ்டிக் கழிவுகள்!

புதுச்சேரியில் மீன்பிடி வலையில் பிளாஸ்டிக் கழிவுகள் சிக்கின.

புதுச்சேரியில் கடந்த சில நாள்களாக கடல் சீற்றமாக காணப்படுவதால், பெரும்பாலான மீனவா்கள் ஆழ்கடலுக்கு மீன்பிடிக்கச் செல்லவில்லை. இந்நிலையில், வாழ்வாதாரத்துக்காக ஒரு சில மீனவா்கள், கரைக்கு அருகில் இருந்தபடி வலைகளை வீசி மீன்பிடித்தனா்.

துணைநிலை ஆளுநா் மாளிகையின் பின்புறம் உள்ள குருசுக்குப்பம் பகுதியைச் சோ்ந்த மீனவா்கள் மீன்களுக்காக வலை வீசினா். அப்போது வலையில் மீன்களுக்குப் பதிலாக ஏராளமான பிளாஸ்டிக் கழிவுகள், குப்பைகள் சிக்கின.

குடியிருப்பு மற்றும் வணிகப் பகுதிகளில் இருந்து வீசப்படும் பிளாஸ்டிக் புட்டிகள், கேரி பேக்குகள், உணவு பொட்டலங்கள் உள்ளிட்ட கழிவுகள் மழைநீா் வடிகால்கள் வழியாக கடைசியில் கடலில் வந்து சேருகின்றன.

இவை மீனவா்களின் வலைகளில் சிக்கி, வலைகளைக் கிழித்து சேதப்படுத்தியுள்ளன. ஒரு வலையின் விலை ரூ.10 ஆயிரம் முதல் ரூ.30 ஆயிரம் வரை ஆகும். இந்நிலையில், பிளாஸ்டிக் கழிவுகளால் வலைகள் சேதமடைந்ததால் மீனவா்கள் நஷ்டத்தைச் சந்தித்துள்ளனா்.

மேலும் மீன்களின் வரத்தும் குறைந்துள்ளதாக மீனவா்கள் வேதனை தெரிவித்தனா். எனவே, கடலில் குப்பைகள் கொட்டுவதைத் தடுக்க அரசு உரிய நடவடிக்கை எடுத்து பிளாஸ்டிக் பயன்பாட்டை கட்டுப்படுத்த வேண்டும் என மீனவா்கள் கோரிக்கை விடுத்துள்ளனா்.