விழுப்புரம் பகுதியில் பலத்த காற்றுடன் மழை: வாழைகள் சேதம்

விழுப்புரம் பகுதியில் பலத்த காற்றுடன் செவ்வாய்க்கிழமை மாலை பெய்த திடீர் மழையால் பல ஏக்கர் வாழைகள் சாய்ந்தன. இதனால் விவசாயிகள் பாதிக்கப்பட்டனர்.
 விழுப்புரம் மாவட்டத்தில் கடந்த சில மாதங்களாக வெயில் வாட்டி வதைத்து வரும் நிலையில், செவ்வாய்க்கிழமை மாலை பரவலாக மழை பெய்தது. விழுப்புரம், வளவனூர், காணை, திருவெண்ணெய்நல்லூர், விக்கிரவாண்டி சுற்றுப் பகுதிகளில் இந்த மழை அரை மணி நேரம் வரை நீடித்தது.
 பலத்த காற்றுடன் பெய்த இந்த மழைக்கு, விழுப்புரம் அருகே பிடாகம் குச்சிப்பாளையத்தில் கார்த்திகேயன் உள்ளிட்ட 5 விவசாயிகளின் 10 ஏக்கர் அளவிலான வாழைகள் சாய்ந்தன. இதே போல, சுற்றுப்பகுதிகளான அத்தியூர் திருவாதி, சித்தாத்தூர், நன்னாடு, வளவனூர், கோலியனூர், பஞ்சமாதேவி உள்ளிட்ட கிராமங்களில் பயிரிட்டிருந்த 10 ஏக்கர் அளவிலான வாழைகள் சாய்ந்தன.
 குலை தள்ளிய நிலையில் வாழைகள் சாய்ந்ததால் விவசாயிகள் வேதனை அடைந்தனர்.
 அதே வேளையில், திடீர் மழையால் வெப்பம் சற்று தணிந்து இதமான சூழல் நிலவியதால் பொதுமக்கள் மகிழ்ச்சி அடைந்தனர்.