மாவட்ட யோகா போட்டி: 300-க்கும் மேற்பட்டோர் பங்கேற்பு

விழுப்புரத்தில் ஞாயிற்றுக்கிழமை நடைபெற்ற மாவட்ட அளவிலான யோகா போட்டிகளில் 300-க்கும் மேற்பட்டோர் பங்கேற்றனர்.
விழுப்புரம் மாவட்ட யோகா சங்கம் சார்பில், மாவட்ட அளவிலான யோகா போட்டிகள் விழுப்புரத்தில் நடைபெற்றது. யோகாசன சங்கத் தலைவர் வெங்கடேசன் போட்டிகளைத் தொடக்கிவைத்தார். பதஞ்சலி யோகா சமிதி மாவட்ட ஒருங்கிணைப்பாளர் ராஜேந்திரபிரசாத் உடனிருந்தார்.
8 முதல் 10 வயது வரை, 11 முதல் 13 வரை உள்ள குழந்தைகளுக்கு 2 பிரிவுகளாகவும், 14 முதல் 16 வயது வரையுள்ள சிறுவர்களுக்கு ஒரு பிரிவாகவும், 17 முதல் 20 வயது வரை, 21 முதல் 24 வயது வரை, 25 முதல் 34 வயது வரை உள்ள பெரியவர்களுக்கு 3 பிரிவுகளாகவும், 35 வயதுக்கு மேல் ஒரு பிரிவாகும் என மொத்தம் 7 பிரிவுகளின் கீழ் போட்டிகள் நடத்தப்பட்டன. 
இதில், சாதாரண யோகாசன முறைகள், இசையுடன் யோகா, நடனத்துடன் யோகா என்று 3 விதமாக போட்டிகள் நடத்தப்பட்டன. இந்தப் போட்டிகளில் 300-க்கும் மேற்பட்டோர் கலந்து கொண்டு யோகாசனங்களை செய்து காட்டினர். இதில், ஒவ்வொரு பிரிவுகளின் கீழ் வெற்றி பெற்ற முதல் 3 பேருக்கு தாலுகா காவல் ஆய்வாளர் ராஜன் பரிசுகளை வழங்கிப் பாராட்டினார். 
இந்தப் போட்டியில் தேர்வு பெற்றவர்கள், வரும் ஆகஸ்ட் மாதம் மாநில அளவில் நடைபெற உள்ள போட்டியில் பங்கேற்க தகுதி பெற்றுள்ளனர்.