கோயில் அருகே தகராறு: 3 பேர் கைது

கண்டமங்கலம் அடுத்த சின்னபாபுசமுத்திரத்தில் கோயில் அருகே தகராறு செய்ததாக 3 பேரை போலீஸார் கைது செய்தனர்.
 கண்டமங்கலம் அருகே சின்னபாபு சமுத்திரம் பகுதியில் உள்ள படேசாயுபு கோயில் அருகே சிலர் நின்று கொண்டு தகராறில் ஈடுபடுவதாக கண்டமங்கலம் போலீஸாருக்கு செவ்வாய்க்கிழமை தகவல் கிடைத்தது.
 இதையடுத்து, காவல் உதவி ஆய்வாளர் சந்திரன் தலைமையிலான போலீஸார் அங்கு விரைந்து சென்றனர். அப்போது, கையில் கட்டையுடன் நின்று கொண்டிருந்த புதுச்சேரி அருமாத்துபுரத்தைச் சேர்ந்த சேகர் மகன் சங்கர்(31), பாஸ்கர் மகன் முத்து(27), கண்டமங்கலத்தைச் சேர்ந்த சின்னதம்பி மகன் பாலமுருகன்(23) ஆகிய 3 பேரை போலீஸார் மடக்கிப் பிடித்தனர்.
 விசாரணையில், அவர்கள் மணல் திருட்டில் ஈடுபடுவது குறித்து போலீஸாருக்கு தகவல் தெரிவிக்கும் பொதுமக்களுக்கு மிரட்டல் விடுக்கும் வகையில் தகராறு செய்தது தெரிய வந்தது. இதையடுத்து அவர்கள் 3 பேரையும் போலீஸார் கைது செய்தனர்.