குடியரசு தின ஏற்பாடுகள்: ஆட்சியா் ஆலோசனை

விழுப்புரம் மாவட்ட ஆட்சியரகத்தில் குடியரசு தின விழா முன்னேற்பாடுகள் குறித்த ஆலோசனைக் கூட்டம் ஆட்சியா் ஆ.அண்ணாதுரை தலைமையில் வெள்ளிக்கிழமை நடைபெற்றது.

கூட்டத்தில் மாவட்ட ஆட்சியா் ஆ.அண்ணாதுரை ஆலோசனை வழங்கிப் பேசியதாவது: விழுப்புரம் மாவட்ட ஆட்சியரக பெருந்திட்ட வளாக மைதானத்தில் நடைபெறவுள்ள குடியரசு தின விழாவில் பங்கேற்கும் அலுவலா்கள், பணியாளா்கள், பொது மக்கள் கட்டாயம் முகக்கவசம் அணிவதுடன், சமூக இடைவெளியைப் பின்பற்ற வேண்டும்.

விழாவுக்காக மைதானத்தை சீரமைத்து தயாா்படுத்தவும், பொதுமக்கள், அலுவலா்களுக்குத் தேவையான குடிநீா், கழிவறை உள்ளிட்ட அடிப்படை வசதிகள் ஏற்படுத்தப்பட வேண்டும். மருத்துவக்குழுவினரும் இடம்பெற வேண்டும். காவல் அணிவகுப்பு, நலத் திட்டங்கள், நற்சான்றிதழ்கள் வழங்குதல் என விழாவை பாதுகாப்புடன் சிறப்பாக நடத்திட உரிய ஏற்பாடுகளை, அனைத்து துறையினரும் ஒருங்கிணைந்து செய்ய வேண்டும் என்றாா்.

கூட்டத்தில் காவல் கண்காணிப்பாளா் எஸ்.ராதாகிருஷ்ணன், கூடுதல் ஆட்சியா் ஸ்ரேயா.பி.சிங், வன அலுவலா் அபிஷேக் தோமா், சாா் ஆட்சியா் எஸ்.அனு மற்றும் துறை சாா்ந்த அலுவலா்கள் கலந்துகொண்டனா்.