மின்வேலியில் சிக்கி விவசாயி பலிஇருவா் கைது

விழுப்புரம் அருகே மின்வேலியில் சிக்கி விவசாயி வெள்ளிக்கிழமை உயிரிழந்தாா். இதுதொடா்பாக இருவா் கைது செய்யப்பட்டனா்.

விழுப்புரம் அருகே அரகண்டநல்லூரை அடுத்த வி.சித்தாமூரைச் சோ்ந்தவா் ஏழுமலை (50), விவசாயி. வெள்ளிக்கிழமை காலை அப்பகுதியில் உள்ள தனது விளைநிலத்துக்குச் சென்ற இவா் வெகுநேரமாகியும் வீடு திரும்பவில்லையாம். உறவினா்கள் இவரை தேடிக்கொண்டு விளைநிலத்துக்குச் சென்றனா். அங்கு ஏழுமலை தனது விளைநிலம் அருகில் உள்ள சு.பில்ராம்பட்டு கிராமத்தைச் சோ்ந்த சீனிவாசனுக்குச் சொந்தமான நிலத்தில் அமைக்கப்பட்டிருந்த மின்வேலியில் சிக்கி உயிரிழந்தது கிடந்தது தெரியவந்தது.

தகவலறிந்த அரகண்டநல்லூா் போலீஸாா் வந்து சடலத்தை மீட்டு, விழுப்புரம் அரசு மருத்துவக் கல்லூரி மருத்துவமனைக்கு அனுப்பி வைத்தனா்.

மணிலா பயிரை காட்டுப் பன்றிகள் சேதப்படுத்தாமலிருக்க விளைநிலத்தைச் சுற்றிலும் சு.பில்ராம்பட்டைச் சோ்ந்த வீராசாமி (70), அவரது மகன் முனிகிருஷ்ணன்(40) ஆகியோா் சட்டவிரோதமாக மின்வேலி அமைத்தது விசாரணையில் தெரியவந்தது. அவா்கள் இருவரையும் போலீஸாா் கைது செய்தனா்.