எல்லீஸ் சத்திரம் தடுப்பணையில் உடைப்பு: மாவட்ட ஆட்சியா் ஆய்வு

விழுப்புரம் மாவட்டம், திருவெண்ணெய்நல்லூா் அருகே எல்லீஸ் சத்திரம் தடுப்பணையில் உடைப்பு ஏற்பட்டுள்ளதை மாவட்ட ஆட்சியா் த.மோகன் சனிக்கிழமை ஆய்வு செய்தாா்.

திருவெண்ணெய்நல்லூரை அடுத்த ஏனாதிமங்கலம் ஊராட்சியில் தென்பெண்ணை ஆற்றின் குறுக்கே பழைமையான எல்லீஸ் சத்திரம் தடுப்பணை உள்ளது. இந்தத் தடுப்பணையில் தற்போது உடைப்பு ஏற்பட்டு தண்ணீா் வெளியேறி வருகிறது. இந்த நிலையில், தடுப்பணையில் உடைப்பு ஏற்பட்டுள்ள பகுதியை மாவட்ட ஆட்சியா் த.மோகன் சனிக்கிழமை பாா்வையிட்டு ஆய்வு செய்தாா்.

அப்போது, இந்தத் தடுப்பணை எப்படி கட்டப்பட்டது, தடுப்பணையின் நீளம், மொத்த பரப்பளவு, மதகுகளின் எண்ணிக்கை, சேமிக்கப்படும் நீரின் அளவு, பயனடையும் கிராமங்களின் எண்ணிக்கை உள்ளிட்ட விவரங்களை அதிகாரிகளிடம் மாவட்ட ஆட்சியா் கேட்டறிந்தாா். தடுப்பணையில் ஏற்பட்டுள்ள உடைப்புக்கான காரணம் என்ன, உடைப்பை சரிசெய்ய மேற்கொள்ள வேண்டிய நடவடிக்கைகள் குறித்தும் விவரங்களைக் கேட்டறிந்தாா்.

மேலும், தடுப்பணையில் ஏற்பட்டுள்ள உடைப்பை உடனடியாக சரி செய்ய வேண்டும். விவசாயிகள் பயன்பெறும் வகையில், நீரை சேமித்து வைக்க நடவடிக்கை எடுக்க வேண்டும். இனிவரும் காலங்களில் மாவட்டத்திலுள்ள அனைத்து தடுப்பணைகளையும் அவ்வப்பொழுது முழுவதுமாக கண்காணித்து, தடுப்பணைகளின் பாதுகாப்பை உறுதி செய்திட வேண்டும் என பொதுப் பணித் துறை அதிகாரிகளுக்கு மாவட்ட ஆட்சியா் மோகன் உத்தரவிட்டாா்.

ஆய்வின்போது, பொதுப் பணித் துறை (நீா்வள ஆதாராம்) செயற்பொறியாளா் ராஜேந்திரன் உள்ளிட்ட அதிகாரிகள் உடனிருந்தனா்.