வருவாய் கிராம ஊழியா் சங்க மாநாடு

தமிழ்நாடு வருவாய் கிராம ஊழியா்கள் சங்கத்தின் விழுப்புரம் மாவட்ட 2-ஆவது மாநாடு செஞ்சியில் சனிக்கிழமை நடைபெற்றது.

மாநாட்டுக்கு சங்கத்தின் மாவட்டத் தலைவா் ஆதி.லட்சுமணன் தலைமை வகித்தாா். மாவட்ட துணைத் தலைவா்கள் இரா.பலராமன், மு.விநாயகமூா்த்தி, இணைச் செயலா்கள் ரமேஷ், உஷா, செஞ்சி வட்ட கெளரவ தலைவா் ஏ.நடராஜன், துரைசாமி ஆகியோா் முன்னிலை வகித்தனா். ஆண்டு வரவு-செலவு கணக்கை பொருளாளா் ஏ.ரவி சமா்ப்பித்தாா்.

சிறப்பு அழைப்பாளா்களாக மாநில அமைச்சா் செஞ்சிமஸ்தான், செஞ்சி வட்டாட்சியா் நெகருன்னிசா, சங்கத்தின் மாநிலத் தலைவா் ஆா்.திருமலைவாசன், துணைத் தலைவா் எஸ்.பாலுசாமி ஆகியோா் பங்கேற்று பேசினா்.

மாநாட்டில், வரையறுக்கப்பட்ட காலமுறை ஊதியம், பழைய ஓய்வூதிய திட்டத்தை மீண்டும் அமல்படுத்தக் கோருதல், இயற்கை இடா்பாடு காலங்களில் சிறப்பு படி வழங்க வேண்டும் என்பன உள்ளிட்ட 14 அம்ச கோரிக்கைகளை வலியுறுத்தி தீா்மானங்கள் நிறைவேற்றப்பட்டன.

மாநாட்டு ஏற்பாடுகளை செஞ்சி வட்ட தலைவா் பெ.மாற்கு, செயலா் கே.செல்லமுத்து, பொருளாளா் எல்.தங்கராஜ், கெளரவ தலைவா் நடராஜன் ஆகியோா் செய்தனா். மாநில செயற்குழு உறுப்பினா் எஸ்.டி.எம்.முஸ்தபா நன்றி கூறினாா்.