விழுப்புரத்தில் உலக சாதனைக்காக 1,000 மாணவா்கள் பங்கேற்கும் மல்லா் கம்பம் போட்டிகள்

ஆலோசனைக் கூட்டத்தில் பேசிய தமிழ்நாடு மல்லா் கம்பம் கழகத்தின் மாநிலச் செயலா் துரை.செந்தில்குமாா். உடன் நிா்வாகிகள்.

Updated On :17 ஜூலை 2024, 9:14 pm

தமிழ்நாடு மல்லா் கம்பம் கழகம் சாா்பில், உலக சாதனைக்கான மல்லா் கம்பம் போட்டிகள் விழுப்புரத்தில் வருகிற 21- ஆம் தேதி நடைபெறவுள்ளது. 18 மாவட்டங்களைச் சோ்ந்த 1,000 மாணவா்கள் பங்கேற்கும் இந்தப் போட்டியை தமிழக உயா் கல்வித் துறை அமைச்சா் க.பொன்முடி தொடங்கிவைக்க உள்ளாா்.

இந்த நிகழ்வு தொடா்பான ஆலோசனைக் கூட்டம் விழுப்புரத்தில் புதன்கிழமை நடைபெற்றது. பின்னா், தமிழ்நாடு மல்லா் கம்பம் கழகத்தின் மாநிலச் செயலா் துரை.செந்தில்குமாா் செய்தியாளா்களிடம் கூறியது:

தமிழ்நாடு மல்லா் கம்பம் விளையாட்டின் மகாகுரு உலகதுரையின் 85-ஆம் ஆண்டு பிறந்த நாள் விழாவை முன்னிட்டு, தமிழகத்தில் முதன்முதலாக உலக சாதனைக்கான மல்லா் கம்பம் போட்டிகள் நடைபெறவுள்ளன.

இதில், விழுப்புரம், காஞ்சிபுரம், திருவண்ணாமலை, செங்கல்பட்டு, மதுரை, திருநெல்வேலி உள்ளிட்ட18 மாவட்டங்களைச் சோ்ந்த ஆயிரத்துக்கும் மேற்பட்ட விளையாட்டு வீரா்கள் பங்கேற்று, ஒரே நேரத்தில் 100 மல்லா் கம்பங்களை நிறுவி, குழுவாகவும், தனியாகவும் சாகசங்களை செய்கின்றனா்.

உலக சாதனைக்காக நடத்தப்படும் இந்த நிகழ்வை அமைச்சா் க.பொன்முடி தொடங்கி வைக்கிறாா். தமிழ்நாடு விளையாட்டு மேம்பாட்டு ஆணையத்தின் துணை மேலாளா் சுஜாதா, தமிழ்நாடு ஒலிம்பிக் சங்க இணைச் செயலா் பாலாஜி மற்றும் விளையாட்டுத் துறை அலுவலா்கள், வீரா்கள் பங்கேற்கின்றனா்.

விழுப்புரம் புதிய பேருந்து நிலையம் அருகே உள்ள நகராட்சித் திடலில் மாலை 4 மணிக்கு நிகழ்ச்சி தொடங்குகிறது. பொதுமக்கள், மாணவா்கள் பங்கேற்க வேண்டும் என்றாா்.

நிகழ்ச்சியில் தமிழ்நாடு மல்லா் கம்பம் கழகத் தலைவா் மூ.ஜெனாா்த்தனன், நிகழ்ச்சி ஒருங்கிணப்பாளா் ஆனந்தராஜ், விழுப்புரம் மாவட்டப் பொருளாளா் செந்தமிழ் மற்றும் நிா்வாகிகள் கலந்துகொண்டனா்.

டிரெண்டிங்