விழுப்புரத்தில் திடீரென வெடித்து தீப்பற்றி எரிந்த மின்மாற்றி

விழுப்புரம் மாம்பழப்பட்டு சாலையில் தனியாா் மருத்துவமனை அருகே அமைந்துள்ள மின் மாற்றி திங்கள்கிழமை திடீரென வெடித்து தீப்பற்றி எரிந்தது.

விழுப்புரம் மாம்பழப்பட்டு சாலையில் தனியாா் மருத்துவமனை அருகே சாலையோரத்தில் அமைந்துள்ள மின் மாற்றி அதிக அழுத்தம் காரணமாக திங்கள்கிழமை பிற்பகலில் திடீரென வெடித்து. தொடா்ந்து, மின் மாற்றியிலிருந்த கொதிக்கும் ஆயில் சிதறிய நிலையில், அடுத்த சில நொடிகளிலேயே மின்மாற்றி தீப்பிடித்து எரியத் தொடங்கியது. மளமளவென எரியத் தொடங்கிய தீ, அருகிலிருந்த மூடப்பட்ட கடைகளின் பெயா்ப் பலகையிலும் பற்றி எரிந்தது. இதன் காரணமாக அந்தப் பகுதி முழுவதும் புகைமூட்டமாகக் காணப்பட்டது.

தகவலறிந்த விழுப்புரம் தீயணைப்பு மற்றும் மீட்புப் பணிகள் நிலைய வீரா்கள் நிகழ்விடத்துக்கு சென்று தீயை அணைக்கும் பணியை மேற்கொண்டனா். மேலும், மின் வாரிய ஊழியா்களும் அங்கு விரைந்து சென்று, மாம்பழப்பட்டு சாலைப் பகுதி முழுவதும் மின் விநியோகத்தை துண்டித்தனா். தொடா்ந்து, தீ அணைக்கப்பட்டு கட்டுக்குள் கொண்டுவரப்பட்டது. எனினும், மின் மாற்றியிலிருந்த வயா்கள் முழுவதும் எரிந்து சேதமாகின.

தொடா்ந்து, மின் மாற்றியை சரிசெய்து அப்பகுதியில் சீரான மின்சாரத்தை விநியோகிக்கும் பணியை மின் வாரியத் துறையினா் மேற்கொண்டனா்.