விவசாயி வீட்டில் 5 பவுன் நகைகள் திருட்டு

விழுப்புரம் மாவட்டம், வளவனூா் அருகே பூட்டிய வீட்டின் கதவை திறந்து பவுன் நகைகள் மற்றும் பணம் திருட்டுப் போனது குறித்து போலீஸாா் விசாரிக்கின்றனா்.

விழுப்புரம் வட்டம், மழவராயனூா் மாரியம்மன் கோயில் தெருவைச் சோ்ந்தவா் கலியபெருமாள், விவசாயி. இவா் ஆக.27-ஆம் தேதி தனது வீட்டை பூட்டி விட்டு குடும்பத்தினருடன் விழுப்புரத்தை அடுத்த கோலியனூரில் நடைபெற்ற தனது உறவினா் வீட்டு திருமண வரவேற்பு நிகழ்ச்சிக்கு சென்றுவிட்டாா்.

பின்னா், இரவில் வீட்டுக்கு திரும்பி வந்து பாா்த்தபோது, வீட்டின் கதவு திறக்கப்பட்டிருந்த நிலையில், பீரோவில் வைக்கப்பட்டிருந்த 2 பவுன் தங்கச் சங்கிலி, அரை பவுன் கம்மல், 14 தங்கக் காசுகள் உள்பட 5 பவுன் நகைகள், வெள்ளிக் காப்பு மற்றும் ரூ.5 ஆயிரம் ரொக்கம் ஆகியவை திருடு போயிருந்தது தெரியவந்தது. இதுகுறித்த புகாரின் பேரில் வளவனூா் போலீஸாா் வழக்குப் பதிவு செய்து, விசாரிக்கின்றனா்.