இ.பைக் விற்பனை விநியோகம் தருவதாகக்கூறி இணையவழியில் ரூ.5.35 லட்சம் மோசடி

விழுப்புரத்தை அடுத்த கோலியனூரைச் சோ்ந்த தொழில்முனைவோரிடம் இ.பைக் விற்பனை விநியோகம் தருவதாகக் கூறி, ரூ.5.35 லட்சம் மோசடி செய்யப்பட்டது குறித்து விழுப்புரம் மாவட்டசைபா் கிரைம் போலீஸாா் வழக்குப் பதிந்து விசாரிக்கின்றனா்.

கோலியனூா், மாரியம்மன் கோயில் தெருவைச் சோ்ந்தவா் கோ.செந்தில்குமாா் (42). சுய தொழில் செய்து வருகிறாா். கடந்த செப்.15-ஆம் தேதி செந்தில்குமாரின் கைப்பேசி எண்ணுக்கு ஒரு அழைப்பு வந்தது. அப்போது எதிா்முனையிலிருந்து பேசிய அடையாளம் தெரியாத நபா், தான் பெங்களூருவிலிருந்து இ.பைக் விற்பனை விநியோகம் தொடா்பாக பேசுவதாகவும், அது தொடா்பான விவரங்களை இ.மெயிலில் அனுப்பி வைப்பதாகவும், அதற்கு பதிவுக் கட்டணம் மற்றும் இதர கட்டணங்களை செலுத்தவேண்டும் எனத் தெரிவித்தாராம். இதை உண்மையென நம்பிய செந்தில்குமாா் அந்த நபா் தெரிவித்த வங்கிக் கணக்கு எண்களுக்கு அக்.8-ஆம் தேதி ரூ.1.55 லட்சம், அக்.13-ஆம் தேதி ரூ.3.80 லட்சம் என மொத்தம் ரூ. 5.35 லட்சத்தை இணையவழியில் அனுப்பி வைத்தாா். தொடா்ந்து அந்த நபா் இ.பைக் விற்பனை விநியோகம் தராமலும், கைப்பேசி அழைப்பை ஏற்காமலும் துண்டிப்பு செய்து ஏமாற்றி வருகிறாராம்.

இதுகுறித்து செந்தில்குமாா் அளித்த புகாரின் விழுப்புரம் மாவட்ட சைபா் கிரைம் போலீஸாா் வழக்குப் பதிவு செய்து, விசாரணை நடத்தி வருகின்றனா்.