எங்கு நிற்கும் இந்தப் பாய்ச்சல்? 5 நாள்களில் நம்பமுடியாத வசூலை அள்ளிய பாகுபலி!

பாகுபலியின் வசூல் நாளுக்கு நாள் மிரட்டிக் கொண்டிருக்கிறது.

முதல் 2 நாள்களில் 100 கோடி வசூலைத் தொட்ட பாகுபலி, இப்போது 5 நாள்களில் 200 கோடியைத் தாண்டிச் சென்றுவிட்டது. இன்னும் படம் வெளியாகி ஒரு வாரமே ஆகாத நிலையில் இதன் வசூல் எங்குப் போய் முடியும் என்று திரையுலகினர் ஆவலுடன் பார்த்துக்கொண்டிருக்கிறார்கள்.

ஏற்கெனவே மிகவிரைவாக 100 கோடி வசூலைத் தொட்ட படம் என்கிற சாதனையோடு அடுத்ததாக 5 நாள்களில் 200 கோடி ரூபாய் வசூலை அள்ளிய முதல் படம் என்கிற சாதனையையும் படைத்துள்ளது பாகுபலி. செவ்வாய் கிழமை வரை 215 கோடி ரூபாய் வசூலை எட்டியுள்ளது. வார நாள்களிலும் இதற்கு டிக்கெட் கிடைப்பது அவ்வளவு எளிதாக இல்லை என்பதால் இதன் வேகம் குறைந்தது இரண்டு வாரங்களுக்காவது நீடிக்கும் என்று கணிக்கப்படுகிறது.

இந்தப் படம் தெலுங்கு, தமிழ், மலையாளம், ஹிந்தி ஆகிய நான்கு மொழிகளில் உருவாக்கப்பட்டு, உலகம் முழுக்க 4000 திரையரங்குகளில் வெளியாகியுள்ளது. இந்தியாவில் மட்டுமில்லாமல் அமெரிக்காவிலும் சக்கைபோடு போடுகிறது பாகுபலி. அங்கு வெளியான தெலுங்கு பாகுபலி முதல் ஐந்து நாளில் மட்டும் 30 கோடி ரூபாயை வசூலித்துள்ளது.

ஹிந்தியில் வெளியான பாகுபலி, நம்பமுடியாத வசூலைப் பெற்று வருகிறது. இதுவரை 5 நாள் கணக்காக ரூ. 35 கோடியைக் கல்லா கட்டியுள்ளது.

எந்திரன் 290 கோடி ரூபாய் வசூலித்தது ஒரு சாதனை. அதை வெளியான முதல் வாரத்திலேயே உடைக்க முயன்று வருகிறது பாகுபலி.