கமலும் சூர்யாவும் மனது வைத்தால் விஜய் சேதுபதி படம் வெளிவரலாம்: இயக்குநர் சீனு ராமசாமி

சீனு ராமசாமி இயக்கத்தில் விஜய் சேதுபதி, விஷ்ணு விஷால், நந்திதா, ஐஸ்வர்யா ராஜேஷ் நடித்த படம் - இடம் பொருள் ஏவல். பல வருடங்களாக வெளிவராமல் உள்ளது. இந்தப் படத்தை அனைவரும் கிட்டத்தட்ட மறந்துவிட்ட நிலையில் இப்படம் பற்றிய செய்திகளைப் பகிர்ந்துகொண்டுள்ளார் சீனு ராமசாமி.

பணப்பிரச்னை காரணமாக படத்தின் வெளியீடு தாமதமாகிறது. கமல் நடித்த உத்தம வில்லன் படத்தினால் தயாரிப்பாளர்களுக்குப் பலத்த நஷ்டம் ஏற்பட்டது. இதனால் கமல் முன்வந்து நஷ்டத்தினால் உண்டான பண இழப்புக்குகளுக்கு உதவி செய்வார் என நம்பிக்கையுடன் உள்ளார்கள் என்று கூறியுள்ளார். 

மேலும் இதுபற்றி ட்விட்டரில் கருத்து தெரிவித்த சீனு ராமசாமி, இடம் பொருள் ஏவல் படம் வெளியே வர வேண்டுமென்றால் 'உத்தமவில்லன்' கமல் அய்யாவும் அஞ்சான் சூர்யாவும் மனது வைத்தால் ஒருவேளை வெளிவரலாம் என்று கூறியுள்ளார்.

படம் எப்படி?: படம் மிக நன்றாக வந்துள்ளது. படம் பார்த்தவர்களும் படத்தைப் பற்றி சிறப்பான முறையில் கருத்து சொல்லியுள்ளார்கள். எல்லாம் சரியாகப் போனால், இந்த வருடம் இடம் பொருள் ஏவல் படம் வெளியாகும் என்று அவர் நம்பிக்கை தெரிவிக்கிறார். வைரமுத்துவும் யுவன் சங்கர் ராஜாவும் இணைந்து பணியாற்ற ஆரம்பித்தது இந்தப் படத்திலிருந்துதான். 2014 டிசம்பரில் பாடல்கள் வெளிவந்தன. 

சீனு ராமசாமி அடுத்ததாக இரு படங்களை இயக்கத் தயாராக உள்ளார். ஒன்றில் விஜய் சேதுபதியும் மற்றொன்றில் சசிகுமாரும் நடிக்க உள்ளார்கள்.