மார்ச் 16 முதல் டீசர், இசை வெளியீடுகள் கிடையாது: தயாரிப்பாளர்கள் சங்கம் அறிவிப்பு

மார்ச் 16 முதல் டீசர், இசை வெளியீடுகள் எதுவும் இருக்காது என்று தமிழ்த் திரைப்படத் தயாரிப்பாளர்கள் சங்கம் அறிவித்துள்ளது.

திரையரங்குகளில் டிஜிட்டல் ஒளிபரப்புக்கு அதிக கட்டணம் வசூலிக்கப்படுவதற்கு எதிராக, கடந்த 1 -ஆம் தேதி முதல் புதிய திரைப்படங்களை வெளியிடக் கூடாது என தமிழ்த் திரைப்படத் தயாரிப்பாளர் சங்கம் முடிவெடுத்தது. தமிழ் திரைப்பட தயாரிப்பாளர் சங்கம் அறிவித்த வேலைநிறுத்தத்தின்படி, கடந்த மார்ச் 1 -ஆம் தேதி முதல் புதிய படங்கள் எதையும் திரையரங்குகளில் வெளியிடாமல் போராட்டம் நடைபெற்று வருகிறது.

மேலும், தமிழகத்தில் மார்ச் 16 -ஆம் தேதி முதல் சினிமா படப்பிடிப்புகள் அனைத்தும் ரத்து செய்யப்படும் என தமிழ் திரைப்பட தயாரிப்பாளர்கள் சங்கம் அறிவித்துள்ளது. 'பெப்சி' அமைப்பின் ஒப்புதலுடன் திரைப்பட தயாரிப்பாளர் சங்கம் இதை அறிவித்துள்ளது. மார்ச் 16 முதல் தமிழ் திரைப்பட படப்பிடிப்புகள் நிறுத்தம், சினிமா நிகழ்ச்சிகளும், போஸ்ட் புரொடெக்சன் பணிகளும் நடைபெறாது என தமிழக தயாரிப்பாளர் சங்கத் தலைவர் விஷால் தெரிவித்தார்.

இந்நிலையில் வேலைநிறுத்தம் நடைபெறுகிறபோது, சினிமா சம்பந்தப்பட்ட இசை வெளியீடு, டீசர் வெளியீடு போன்ற எந்த நிகழ்ச்சிகளும் நடைபெறாது என்றும் புதிய திரைப்படங்கள் சம்பந்தமாக எந்தவொரு விளம்பரத்தையும் பத்திரிகைகளுக்குக் கொடுப்பதில்லை என்றும் முடிவெடுக்கப்பட்டுள்ளதாக தமிழ்த் திரைப்படத் தயாரிப்பாளர்கள் சங்கம் தனது புதிய அறிக்கையில் தகவல் தெரிவித்துள்ளது.