இன்று பிறந்த நாள் கொண்டாடும் நடிகை ஆண்ட்ரியாவுக்குப் பிறந்த நாள் பரிசாக பிசாசு 2 போஸ்டரை வெளியிட்டுள்ளார் இயக்குநர் மிஷ்கின்.
சைக்கோ படத்துக்கு அடுத்ததாக விஷால் நடிப்பில் துப்பறிவாளன் 2 படத்தை இயக்கி வந்த மிஷ்கின், விஷாலுடன் ஏற்பட்ட கருத்துவேறுபாடுகள் காரணமாக அப்படத்திலிருந்து விலகிவிட்டார். இதனால் துப்பறிவாளன் 2 படத்தை விஷாலே இயக்கி வருகிறார்.
தனது பிறந்த நாளன்று பிசாசு 2 படம் பற்றிய அறிவிப்பை வெளியிட்டார் மிஷ்கின். ஆண்ட்ரியா நடிப்பில் பிசாசு 2 படத்தை இயக்கவுள்ளதாக அறிவித்தார். இசை - கார்த்திக் ராஜா.
இப்படத்தின் படப்பிடிப்பு கடந்த வாரம் பூஜையுடன் தொடங்கியது.
இந்நிலையில் நடிகை ஆண்ட்ரியா இன்று தனது பிறந்த நாளைக் கொண்டாடி வருகிறார். இதையடுத்து அவருக்கான பிறந்த நாள் பரிசாக ஆண்ட்ரியாவின் கதாபாத்திரத்தை வெளிப்படுத்தும் பிசாசு 2 போஸ்டரை வெளியிட்டுள்ளார் மிஷ்கின்.
