உலகளவில் பிரபலமான ஸ்பெயின் நாட்டு இணையத் தொடர் மணி ஹைஸ்ட் இரண்டு பகுதிகளாக முறையே செப்டம்பர் மற்றும் டிசம்பர் மாதங்களில் வெளியாகிறது.
மணி ஹைஸ்டின் முதலிரண்டு பாகங்கள் 2017-இல் வெளியாகின. அடுத்த இரண்டு பாகங்கள் 2019-2020-இல் வெளியாகின. இதன் கதாபாத்திரங்கள் இந்தியா உள்பட உலகளவில் மிகவும் பிரபலமாகின. குறிப்பாக கடந்தாண்டு பொது முடக்கத்தின்போது இந்த இணையத் தொடர் சமூக ஊடகங்களை ஆக்கிரமித்தது. இதனால், மணி ஹைஸ்டின் முடிவுக்காக ரசிகர்கள் ஆவலுடன் காத்திருந்தனர்.
இந்த நிலையில், 5-ம் பாகத்தின் படப்பிடிப்பு சமீபத்தில் நிறைவுற்றது. இதைத் தொடர்ந்து, தற்போது ப்ரோமோ விடியோவுடன் 5-ம் பாகத்தின் தேதியை இணையத் தொடரின் குழு வெளியிட்டுள்ளது.
மணி ஹைஸ்ட் 5-வது பாகம் தலா 5 அத்தியாயங்கள் என இரண்டு பகுதிகளாக வெளியாகிறது. முதல் பகுதி செப்டம்பர் 3-ம் தேதியும், 2-ம் பகுதி டிசம்பர் 3 தேதியும் வெளியாகின்றன.
இந்த அறிவிப்பு வெளியானதைத் தொடர்ந்து, மணி ஹைஸ்ட் மீண்டும் சமூக ஊடகங்களை ஆக்கிரமிக்கத் தொடங்கியுள்ளது.