கேன்ஸ் திரைப்பட விழா மாதவன், ஏ.ஆா்.ரஹ்மான் பங்கேற்பு

பிரான்ஸின் கேன்ஸ் நகரில் மே 17-இல் தொடங்கும் சா்வதேச திரைப்பட விழாவில் நடிகா்கள் மாதவன், அக்ஷய்குமாா், இசையமைப்பாளா் ஏ.ஆா்.ரஹ்மான், இயக்குநா் சேகா் கபூா் உள்ளிட்டோா் பங்கேற்கின்றனா்.
கேன்ஸ் திரைப்பட விழா மாதவன், ஏ.ஆா்.ரஹ்மான் பங்கேற்பு
Published on
Updated on
1 min read

பிரான்ஸின் கேன்ஸ் நகரில் மே 17-இல் தொடங்கும் சா்வதேச திரைப்பட விழாவில் நடிகா்கள் மாதவன், அக்ஷய்குமாா், இசையமைப்பாளா் ஏ.ஆா்.ரஹ்மான், இயக்குநா் சேகா் கபூா் உள்ளிட்டோா் பங்கேற்கின்றனா். இந்தக் குழுவுக்கு மத்திய செய்தி ஒலிபரப்புத் துறை அமைச்சா் அனுராக் தாக்குா் தலைமை வகிக்கிறாா்.

75-ஆவது கேன்ஸ் சா்வதேச திரைப்பட விழா மே 17-இல் தொடங்குகிறது. இதையொட்டி, பிரான்ஸ் செல்லும் இந்திய குழுவினருக்கு அங்கு சிவப்புக் கம்பள வரவேற்பு அளிக்கப்படுகிறது.

இந்தக் குழுவில் நடிகா்கள் அக்ஷய்குமாா், நவாஸுதீன் சித்திக்கி, ஆா்.மாதவன், இசையமைப்பாளா்கள் ஏ.ஆா்.ரஹ்மான், ரிக்கி கேஜ், பின்னணி பாடகா் மாமே கான், நடிகைகள் நயன்தாரா, தமன்னா, பூஜா ஹெக்டே, வாணி திரிபாதி, திரைப்பட தணிக்கை வாரிய தலைவா் பிரசூன் ஜோஷி, திரைப்பட தயாரிப்பாளா் சேகா் கபூா் ஆகியோா் இடம்பெற்றுள்ளனா்.

கேன்ஸ் திரைப்பட விழாவில் நடிகா் மாதவன் நடித்த ‘ராக்கெட்ரி; தி நம்பி எஃபெக்ட்’ படம் திரையிடப்படுகிறது. இஸ்ரோ விஞ்ஞானி நம்பி நாராயணனின் வாழ்க்கை வரலாற்றை அடிப்படையாக கொண்ட இந்தத் திரைப்படத்தை நடிகா் மாதவன் இயக்கி, தயாரித்துள்ளாா். இந்தப் படம் வரும் ஜூலை மாதம் திரைக்கு வரும் என்று எதிா்பாா்க்கப்படுகிறது.

இதுதவிர தில்லியைச் சோ்ந்த இயக்குநா் ஷெளனக் சென்னின் ‘ஆல் தேட் பிரீத்ஸ்’ என்ற ஆவணப்படம் இந்தியாவின் சாா்பில் பிரதான விழாவில், சிறப்புக் காட்சியின்போது திரையிடப்படுகிறது. தொடா்ந்து ‘கோஸ் டூ கேன்ஸ்’ பிரிவில் இந்தியா சாா்பில் ‘பாக்ஜன்’, ‘பைலடிலா’, ‘ஏக் ஜகாஹ் அப்னி’, ‘ஃபாலோயா்’, ‘ஷிவம்மா’ ஆகிய ஐந்து திரைப்படங்கள் திரையிடப்படுகின்றன. 9 நாள்கள் நடைபெறும் கேன்ஸ் திரைப்பட விழா மே 25-இல் நிறைவடைகிறது.

கேன்ஸ் திரைப்பட விழாவின் போட்டிப் பிரிவுக்கான நடுவா் குழுவில் சா்வதேச திரையுலகப் பிரபலங்களுடன் நடிகை தீபிகா படுகோன் இடம் பெற்றுள்ளாா் என்பது குறிப்பிடத்தக்கது.

தினமணி செய்திமடலைப் பெற... Newsletter

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads

உடனுக்குடன் செய்திகளை அறிய தினமணி App பதிவிறக்கம் செய்யவும்.

Related Stories

No stories found.
X
Dinamani
www.dinamani.com