விஜய் தொலைக்காட்சியை புறக்கணியுங்கள் என்ற ஹேஷ்டேக் இணையத்தில் டிரெண்டாகி வருகிறது.
பிக்பாஸ் சீசன் 6 நிகழ்ச்சியின் இறுதிப்போட்டியாளர்களில் அசீம் வெற்றி பெற்றதைத் தொடர்ந்து, விக்ரம், சிவினுக்கு ஆதரவாக எழுந்த பதிவுகளில், விஜய் தொலைக்காட்சியை புறக்கணியுங்கள் எனப் பதிவிடப்பட்டு வருகிறது.
விஜய் தொலைக்காட்சியில் ஒளிபரப்பாகி வந்த பிக்பாஸ் சீசன் 6 நிகழ்ச்சி நேற்றுடன் இறுதிக்கட்டதை எட்டியது. இந்த நிகழ்ச்சியை நடிகர் கமல்ஹாசன் தொகுத்து வழங்குகிறார்.
நிகழ்ச்சியின் இறுதிப்போட்டியாளர்களாக அஷீம், விக்ரம், சிவின் ஆகியோர் இருந்தனர். இதில், வெற்றியை அறிவிக்கும் மேடைக்கு அஷீம் மற்றும் விக்ரம் மேடைக்கு அழைக்கப்பட்டனர்.
சமூக வலைதளங்களில் இருவருக்குமே ரசிகர்கள் குவிந்துள்ளனர். எனினும், சக போட்டியாளர்களை கோபத்தில் கடுமையாக பேசியதால், அஷீம் பலமுறை கமல்ஹாசனால் கண்டிக்கப்பட்டுள்ளார்.
அதேவேளையில், விக்ரம் தன்னுடைய நிதானத்தால் பலரின் மனங்களைக் கவர்ந்தவராக அறியப்படுகிறார்.
இந்நிலையில், பிக்பாஸ் சீசன் 6 நிகழ்ச்சியின் வெற்றியாளராக அஷீம் அறிவிக்கப்பட்டதைத் தொடர்ந்து, அவருக்கு எதிராகவும், விஜய் தொலைக்காட்சிக்கு எதிராகவும் பலர் தங்களது சமூக வலைதளங்களில் கருத்துகளை பதிவிட்டு வருகின்றனர்.
அந்தவகையில், அப்யூஸர் அஷீம், பாய்காட் விஜய்டிவி என்ற ஹேஷ்டேக்குகள் வைரலாகி வருகின்றன. இந்த ஹேஷ்டேக்குகளைக் குறிப்பிட்டு அஷீம், விஜய் டிவி மற்றும் பிக்பாஸ் நிகழ்ச்சிக்கு எதிராக பலர் கருத்துகளைப் பதிவிட்டு வருகின்றனர்.