எதிர்நீச்சல் தொடரில் ஆதி குணசேகரன் பாத்திரத்தில் நடிகர் வேல ராமமூர்த்தி நடிக்கத்தொடங்கிய பிறகு எதிர்நீச்சல் டிஆர்பி வெளியாகியுள்ளது.
விஜய் தொலைக்காட்சியில் இரவு 9.30 மணிக்கு பிக்பாஸ் -7 நிகழ்ச்சி ஒளிபரப்பாவதால், எதிர்நீச்சல் ஒளிபரப்பு நேரம் இரவு 9 மணிக்கு மாற்றப்பட்டிருந்தது. இதனிடையே இந்த வாரத்துக்கான டிஆர்பி பட்டியல் வெளியாகியுள்ளது. இதில் பிக்பாஸ் நிகழ்ச்சியை விட எதிர்நீச்சல் தொடர் அதிக டிஆர்பி பெற்றுள்ளது.
சன் தொலைக்காட்சியில் வாரத்தின் அனைத்து நாள்களிலும் ஒளிபரப்பாகிவரும் தொடர் எதிர்நீச்சல். இந்தத் தொடரில் ஆதிகுணசேகரன் பாத்திரம் பலதரப்பட்ட மக்களைக் கவர்ந்துள்ளது. இந்த பாத்திரத்தில் நடித்துவந்த நடிகர் மாரிமுத்து மறைந்த பிறகு, அவருக்கு பதிலாக வேல ராமமூர்த்தி மாற்றப்பட்டார்.
தற்போது ஆதி குணசேகரன் பாத்திரத்தில் வேல ராமமூர்த்தி நடித்துவருகிறார். இவர் நடிக்கத் தொடங்கிய பிறகு எதிர்நீச்சல் தொடரின் டிஆர்பி வெளியாகியுள்ளது.
ஆதி குணசேகரனாக நக்கல் கலந்த வில்லத்தனத்துடன் நடிக்கும் மாரிமுத்து இடத்தை வேறு எந்த நடிகராலும் நிரப்ப முடியாது என ரசிகர்கள் மத்தியில் கருத்து நிலவியது. அதனை உண்மையாக்கும் வகையிலேயே வேல ராமமூர்த்தியின் நடிப்பும் அமைந்துள்ளது. கோபக்கார குணசேகரன் வருகிறாரே தவிர நக்கல், நையாண்டி கலந்த குணசேகரன் வேல ராமமூர்த்தியிடம் இயல்பாக வெளிப்படவில்லை.
இதனிடையே இந்த வாரம் வெளியான டிஆர்பி பட்டியலில் எதிர்நீச்சல் தொடர் 11.54 புள்ளிகளைப் பெற்றுள்ளது. இது மற்ற வாரங்களில் எதிர்நீச்சல் பெற்ற டிஆர்பியை விட அதிகம். (விஜய் தொலைக்காட்சியில் 9.30 மணிக்கு ஒளிபரப்பாகும் பிக்பாஸ் -7 நிகழ்ச்சி 4.17 புள்ளிகளை மட்டுமே பெற்றுள்ளது.)
குறிப்பாக மாரிமுத்து நடிக்கும்போது பெரும்பாலும் 10 புள்ளிகளுக்கு மேல் மட்டுமே எதிர்நீச்சல் தொடர் டிஆர்பி பெற்றுவந்தது. ஆனால், வேல ராமமூர்த்திக்கு பிறகு தற்போது 11.54 புள்ளிகளை எதிர்நீச்சல் தொடர் பெற்றுள்ளது.
நீண்ட இடைவேளைக்குப் பிறகு எதிர்நீச்சல் தொடரில் ஆதி குணசேகரன் வருவதாலும், புதிய ஆதி குணசேகரனாக வரும் வேல ராமமூர்த்தியின் நடிப்பு எப்படி உள்ளது என்பதைப் பார்க்கும் ஆர்வமிகுதியாலும் இந்த வாரம் எதிர்நீச்சல் தொடர் அதிக டிஆர்பியை பெற்றுள்ளது என்பதே பலரின் கருத்தாக உள்ளது.