கங்கனா.. நான் உங்கள் ரசிகை: ஜோதிகா

கடந்த 2005-ஆம் ஆண்டு ரஜினிகாந்த் நடிப்பில் பி.வாசு இயக்கத்தில் வெளியான சந்திரமுகி படத்தின் இரண்டாம் பாகத்தில் ராகவா லாரன்ஸ் நடித்துள்ளார். சந்திரமுகி திரைப்படம் 200 நாட்களுக்கு மேல் திரையரங்குகளில் காட்சிப்படுத்தப்பட்டு பெரும் வெற்றி பெற்றதோடு மிக அதிகமான வசூலையும் குவித்தது குறிப்பிடத்தக்கது.  

லைகா புரடக்ஷன் தயாரிப்பில் ராகவா லாரன்ஸ் நடிப்பில் உருவாகியுள்ள சந்திரமுகி - 2 படத்திற்கு ஆஸ்கர் வென்ற எம்.எம்.கீரவாணி இசையமைக்கிறார். ஆர்.டி.ராஜசேகர் ஒளிப்பதிவு செய்துள்ளார். கலை - தோட்டா தரணி.  மேலும், கங்கனா ரணாவத், ராதிகா, ஸ்ருஷ்டி, நகைச்சுவை நடிகர் வடிவேலு முக்கியக் கதாபாத்திரங்களில் நடித்துள்ளனர்.

சமீபத்தில் இப்படத்தின் டிரைலர் வெளியாகி வரவேற்பைப் பெற்றது. மேலும், இப்படம் வருகிற விநாயகர் சதுர்த்தியை(செப்.15) முன்னிட்டு வெளியாகும் என படக்குழு அதிகாரப்பூர்வமாக தெரிவித்திருந்தது. 

இதையும் படிக்க: சூர்யாவுக்கு ஜோடியாக நஸ்ரியா?

இதில் ஜோதிகா நடித்த சந்திரமுகி கதாபாத்திரமாக தேசிய விருது வென்ற நடிகை கங்கனா ரணாவத் நடித்துள்ளதால் ரசிகர்கள் மத்தியில் அதிக எதிர்பார்ப்புள்ளது.

இந்நிலையில், நடிகை ஜோதிகா தன் இன்ஸ்டாகிராம் பக்கத்தில், “இந்திய சினிமாவில் திறமையான நடிகைகளில் ஒருவர் கங்கனா ரணாவத். அவர் ‘சந்திரமுகி’ கதாபாத்திரத்தில் நடிப்பதைப் பார்த்து மிகவும் பெருமையடைகிறேன். இக்கதாபாத்திரத்தில் நீங்கள் வசீகரமாக இருக்கிறீர்கள். நான் உங்கள் ரசிகை. உங்களின் நடிப்பை காண ஆவலுடன் காத்திருக்கிறேன். லாரன்ஸ் மாஸ்டருக்கும், இயக்குநர் பி.வாசுவுக்கும் பெரிய வெற்றி கிடைக்க வாழ்த்துக்கள்” எனக் குறிப்பிட்டுள்ளார்.