லியோ - விஜய் பேசிய தகாத வார்த்தை நீக்கம்!

லோகேஷ் கனகராஜ் இயக்கத்தில் விஜய் நடிப்பில் உருவாகியுள்ள லியோ திரைப்படத்தின் டிரைலர் அக். 5ஆம் தேதி வெளியானது. டிரைலருக்கு ரசிகர்கள் மத்தியில் மிகப்பெரிய அளவில் வரவேற்பு கிடைத்துள்ளது. கவனம் ஈர்க்கும் சண்டைக்காட்சிகளையும் விஜய்யின் இரு வித்தியாசமான தோற்றத்தையும் ரசிகர்கள் கொண்டாடி வருகின்றனர்.

அதேநேரம், டிரைலரில் விஜய் பேசிய தகாத வார்த்தையும் சர்ச்சையானது. இந்நிலையில், யூடியூபில் வெளியான டிரைலரில் குறிப்பிட்ட அந்த வார்த்தையை ஓசையில்லாமல் (மியூட்) செய்துள்ளனர்.

இதையும் படிக்க: அஜித் படத்தில் இணையும் ரெஜினா!

முன்னதாக, நேர்காணல் ஒன்றில் பேசிய லோகேஷ் கனகராஜ், “பார்த்திபன் கதாபாத்திரத்திற்குத் தேவைப்பட்டதால்தான் இந்த வார்த்தையைப் பயன்படுத்தினேன். இதற்கும் விஜய் அண்ணாவுக்கும் தொடர்பு இல்லை. இதனால் ஏற்பட்ட குழப்பங்களுக்கு நான் பொறுப்பேற்றுக் கொள்கிறேன்” எனக் கூறியிருந்தார். சில ரசிகர்கள் இக்கருத்தை ஏற்றுக்கொண்டாலும் அந்த வார்த்தைக்கான அர்த்தம் விஜய்க்கு தெரியாதா? ஒரு இயக்குநர் சொன்னாலும் உச்சத்தில் இருக்கும் நட்சத்திர நடிகர் இதைத் தவிர்த்திருக்க வேண்டும் என்றும் கருத்துக்கள் பகிரப்பட்டு வந்தன.

லியோ அக்.19 ஆம் தேதி உலகளவில் வெளியாக உள்ளதால், படத்தின் புரோமோஷன் பணிகள் தீவிரமாக நடைபெற்று வருகிறது.