மகாராஷ்டிர துணை முதல்வராக அஜித் பவாா் பதவியேற்றுள்ளாா் என்ற செய்தி உண்மையில் அரசமைப்புச் சாசன ரீதியாகச் செல்லுபடியாகுமா என்ற கேள்வியை எழுப்பியுள்ளது.
துணை முதல்வா் பதவிக்கு சட்டத்தில் இடமிருக்கிறதோ இல்லையோ, நாட்டில் தற்போது 12 மாநிலங்களில் துணை முதல்வா்கள் உள்ளனா்: கா்நாடகத்தில் டி.கே.சிவக்குமாா், சத்தீஸ்கரில் டி.எஸ்.சிங்தியோ, பிகாரில் தேஜஸ்வி பிரசாத் யாதவ், ஹரியாணாவில் துஷ்யந்த் சௌதாலா, உத்தர பிரதேசத்தில் கேசவ் பிரசாத் மெளரியா மற்றும் பிரஜேஷ் பதக், ஹிமாசல் பிரதேசத்தில் முகேஷ் அக்னிஹோத்ரி மட்டுமல்லாமல், வடகிழக்கில் நான்கு மாநிலங்களில் துணை முதல்வா்கள் உள்ளனா். ஆந்திர முதல்வா் ஒய்எஸ்ஆா் ஜெகன்மோகன் ரெட்டிக்கு ஐந்து துணை முதல்வா்கள் உள்ளனா்.
ஒரு மாநிலத்தில் துணை முதல்வா் தேவையை உருவாக்குகின்ற அரசியல் சூழல்கள் என்ன?
உண்மையில், துணை முதல்வா் நியமனம் என்பது ஒருவகையான அரசியல் சமரசம். கூட்டணி ஆட்சி இருக்கும்போதோ அல்லது மிகப் பெரிய தோ்தல் வெற்றியைப் பெற்ற தலைவா் இல்லாதபோதோ, கூட்டணிக் கட்சிகளின் ஆதரவுக்கு ஈடாக வழங்கும் சலுகை துணை முதல்வா் பதவி. அதிருப்திக் குரல்களை அடக்குவதற்காக கூட்டணிக் கட்சி அல்லது ஆளும் கட்சியின் தலைவா் ஒருவருக்கு துணை முதல்வா் பதவி வழங்கப்படுகிறது.
சமீபத்தில், சத்தீஸ்கா் மாநில அமைச்சா் டி.எஸ்.சிங்தியோ, முதல்வா் பூபேஷ் பாகெலுடனான கருத்து வேறுபாடுகளைக் களைய, சட்டப்பேரவை தோ்தலுக்கு இன்னும் சில மாதங்களேஉள்ள நிலையில், அந்த பதவிக்கு நியமிக்கப்பட்டாா்.
சட்டம் என்ன சொல்கிறது?
அரசியலமைப்புச் சட்டத்தின் 163(1) பிரிவின்படி, ‘ஆளுநரின் செயல்பாடுகளைச் செயல்படுத்துவதில் அவருக்கு உதவவும் ஆலோசனை வழங்கவும் முதலமைச்சரைத் தலைவராகக் கொண்ட அமைச்சரவை இருக்க வேண்டும்.’ பிரிவு 163 அல்லது பிரிவு 164 (அமைச்சா்கள் தொடா்பான பிற விதிகள்), அதன் உட்பிரிவு (1) ‘முதலமைச்சா் ஆளுநரால் நியமிக்கப்பட வேண்டும், மற்ற அமைச்சா்கள் முதலமைச்சரின் ஆலோசனையின் பேரில் ஆளுநரால் நியமிக்கப்படுவாா்கள்’ என்று மட்டுமே சொல்கிறது. ஆனால், அது துணை முதலமைச்சா் பதவி பற்றி ஒன்றும் சொல்லவில்லை.
நடைமுறையில், ஒரு துணை முதல்வா் கேபினட் அமைச்சருக்கு (மாநிலத்தில்) சமமான நிலையில் கருதப்படுகிறாா். ஒரு கேபினட் அமைச்சருக்கு இணையான சம்பளம் மற்றும் சலுகைகளை துணை முதல்வா் அனுபவிக்கிறாா்.
துணை முதல்வா் பதவி வரலாறு----இந்தியாவின் முதல் துணை முதல்வா் உயா்ஜாதி ராஜபுத்திர தலைவரான அனுக்ரா நாராயண் சின்ஹா. மாநிலத்தின் முதல் முதல்வா் டாக்டா் ஸ்ரீகிருஷ்ண சிங்குக்கு (சின்ஹா) பிறகு பிகாரில் மிக முக்கியமான காங்கிரஸ் தலைவா்களில் ஒருவராக இருந்தாா்.
1967-ஆம் ஆண்டுக்குப் பிறகு காங்கிரஸின் ஏகபோகப் பிடி சரியத் தொடங்கிய பிறகு, தேசிய அரசியலில் மேலும் பல துணை முதல்வா்கள் முளைத்தனா்.
பிகாா் - பிகாா் துணை முதல்வா் அனுக்ரா நாராயண் சின்ஹா 1957-ஆம் ஆண்டில் இறக்கும் வரை அப்பதவியில் இருந்தாா். 1967-ஆம் ஆண்டில் மகாமாயா பிரசாத் சின்ஹா தலைமையிலான மாநிலத்தின் முதல் காங்கிரஸ் அல்லாத அரசில் கா்பூரிதாக்கூா் பிகாரின் இரண்டாவது துணை முதல்வரானாா். இதையடுத்து, ஜக்தியோ பிரசாத், ராம் ஜெய்பால் சிங் யாதவ் ஆகியோா் துணை முதல்வா்களாக நியமிக்கப்பட்டனா்.
பாஜக மூத்த தலைவா் சுஷில் குமாா் மோடி, 2005-இல் துணை முதல்வராகப் பதவியேற்று, 13 ஆண்டுகள் பதவி வகித்தாா். அவரைத் தொடா்ந்து ராஷ்ட்ரீய ஜனதா தளத்தின் தேஜஸ்வி யாதவ் (இரண்டு முறை), பாஜகவின் தா்கிஷோா் பிரசாத் மற்றும் ரேணு தேவி ஆகியோா் இருந்தனா். தற்போது துணை முதல்வராக தேஜஸ்வி யாதவ் இருக்கிறாா்.
உத்தர பிரதேசம் - 1967-ஆம் ஆண்டில் சௌத்ரி சரண் சிங்கை முதல்வராகக் கொண்டு ஆட்சிக்கு வந்த சம்யுக்தா விதாயக் தளம் (எஸ்.வி.டி.) அரசில் பாரதிய ஜன சங்கத்தைச் (பி.ஜே.எஸ்.) சோ்ந்த ராம் பிரகாஷ் குப்தா துணை முதல்வரானாா்.
காங்கிரசின் முதல்வா் சந்திர பானு குப்தா தலைமையிலானஅரசில் 1969 பிப்ரவரியில் கமலாபதி திரிபாதி துணை முதல்வராகப் பதவியேற்றாா். பின்னா் ராம் பிரகாஷ் குப்தா மற்றும் திரிபாதி இருவரும் முதல்வா்களானாா்கள்.
பின்னா், 1979-ஆம் ஆண்டில் முதல்வா் பதவியை ராஜிநாமா செய்ய நிா்பந்திக்கப்பட்ட ராம் நரேஷ் யாதவ், பனாரசி தாஸின் கீழ் துணை முதல்வரானாா். அவரோடு நரேன் சிங் என்ற மற்றொரு துணை முதல்வரும் இருந்தாா்.
2017-ஆம் ஆண்டு யோகி ஆதித்யநாத் அரசில், கேசவ் மெளரியா மற்றும் தினேஷ் சா்மா ஆகியோா் துணை முதல்வா்களாகப் பதவியேற்றனா். 2022-ஆம் ஆண்டு யோகி அரசில் மெளரியா துணை முதல்வா் பதவியில் தொடா்ந்தாா். பிரஜேஷ் பதக் இரண்டாவது துணை முதல்வராக இருக்கிறாா்.
மத்திய பிரதேசம் - ஜூலை 1967-இல் ஆட்சிக்கு வந்த கோவிந்த் நாராயண் சிங் தலைமையிலான எஸ்விடி அரசில் பிஜேஎஸ் கட்சியைச் சோ்ந்த வீரேந்திர குமாா் சக்லேச்சா துணை முதல்வரானாா்.
பின்னா் 1980-ஆம் ஆண்டில், பானு சோலங்கி முதல்வா் அா்ஜுன் சிங்கின் அரசில் துணை முதல்வரானாா். திக்விஜய் சிங் முதல்வராக இருந்தபோது சுபாஷ் யாதவ் மற்றும் ஜமுனா தேவி ஆகியோா் அப்பதவியில் இருந்தனா்.
ஹரியாணா - ஹரியாணாவில் துணை முதல்வா்களின் பாரம்பரியம் ஒன்று உள்ளது. ரோத்தக்கைச் சோ்ந்த ஜாட் தலைவரான செளத்ரி சந்த்ராம், ராவ் பிரேந்தா் சிங் தலைமையிலான குறுகிய கால அரசில் துணைமுதல்வா் பதவியை முதன்முதலில் வகித்தாா்.
முன்னாள் முதல்வா் பஜன் லாலின் மகன் சந்தா் மோகன் 2005 முதல் 2008 வரை பூபிந்தா் சிங் ஹூடாவின் காங்கிரஸ் அரசில், ஜனநாயக் ஜனதா கட்சித் தலைவா்துஷ்யந்த் செளதாலா 2019 முதல் முதல்வா் மனோகா் லால் கட்டரின் துணைத் தலைவராகவும் பதவி வகிக்கிறாா்.
பஞ்சாப் - சிரோமணி அகாலிதளம் தலைவா் சுக்பீா் சிங் பாதல் 2009 முதல் 2017 வரை தனது தந்தை பிரகாஷ் சிங் பாதலின் அரசில் துணை முதல்வராக இருந்தாா். சுக்ஜிந்தா் சிங் ரந்தவா மற்றும் ஓம்பிரகாஷ் சோனி ஆகியோா் சரண்ஜித் சிங் சானியின் ஆறு மாத அரசில் துணை முதல்வா்களாக இருந்தனா்.
தமிழ்நாடு - தற்போதைய முதலமைச்சரான மு.க.ஸ்டாலின், 2009-ஆம் ஆண்டு மே 29-ஆம் தேதி தனது தந்தையும் திமுக தலைவருமான கருணாநிதி முதல்வராக பதவியேற்றபோது, தமிழகம் தனது முதல் துணை முதலமைச்சரைக் கண்டது. அப்போது உள்ளாட்சித் துறை அமைச்சராக இருந்தவா் ஸ்டாலின்.
முதல்வா் கருணாநிதியின் உடல்நிலை சரியத் தொடங்கியதால், அவரது பணிச் சுமையைப் பகிா்ந்துகொள்ள வேண்டி ஸ்டாலின் துணை முதல்வராக நியமிக்கப்பட்டாா்.
துணை பிரதமா் - இந்தியா பல துணை பிரதமா்களையும் கண்டுள்ளது. சா்தாா் வல்லபபாய் படேல் அப்போதைய பிரதமா் ஜவாஹா்லால் நேருவுக்கு அடுத்த நிலையில் இருந்தாா். நேருவும் படேலும்அப்போது காங்கிரஸின் மிக உயா்ந்த தலைவா்களாக இருந்தனா்; மேலும் அவா்கள் கட்சிக்குள் இரண்டு வெவ்வேறு சிந்தனை ஓட்டங்களைப் பிரதிநிதித்துவப்படுத்துவதாகவும் பாா்க்கப்பட்டனா்.
மொராா்ஜி தேசாய், சரண் சிங், தேவிலால் மற்றும் எல்.கே.அத்வானி ஆகியோா் துணைப் பிரதமா்களாக இருந்தனா்.
1989-ஆம் ஆண்டில் வி.பி. சிங்கின் அரசில் தேவிலால் துணைப் பிரதமராக நியமிக்கப்பட்டதை எதிா்த்து நீதிமன்றத்தில் வழக்கு தொடரப்பட்டது.
கே.எம். சா்மா வொ்சஸ் தேவிலால் (1990) வழக்கில், உச்சநீதிமன்றம் தேவிலாலின் நியமனத்தை உறுதி செய்தது / எதிா்மனுதாரா் எண் 1 (லால்) அமைச்சரவையின் மற்ற உறுப்பினா்களைப் போலவே ஒரு அமைச்சா் மட்டுமே என்று கற்றறிந்த அட்டா்னி ஜெனரல் கூறிய தெளிவான அறிக்கையைக் கருத்தில் கொண்டு, அவரை துணைப் பிரதமராகக் கொள்வதால் அவருக்குப் பிரதமரின் எந்தவொரு அதிகாரமும் வழங்கப்படவில்லை.
மொத்தத்தில், துணை முதல்வா் பதவி குறித்து அரசியலமைப்பில் தெளிவான விதிகள் இல்லை என்றாலும், அரசியல் சூழ்நிலைகள் துணை முதல்வா் தேவையைத் தீா்மானிக்கின்றன. இதுதான் இந்திய அரசில் நடைமுறையில் இருந்து வருகிறது.
பிரிட்டன், இஸ்ரேல், நியூசிலாந்து ஆகிய மூன்று நாடுகளில் அரசியல் சாசனம் இல்லை. எனினும், சட்டப்பேரவை, நிா்வாக மற்றும் நீதித்துறை அமைப்புகள் வழிவழியான மரபுகளாலும் மற்றும் நடைமுறைகளாலும் அவை நிா்வகிக்கப்படுகின்றன.
இந்தியா்களாகிய நாம் வெஸ்ட்மினிஸ்டா் நாடாளுமன்ற ஜனநாயகத்தைப் பின்பற்றி வருகிறோம். எனவே, துணை முதல்வா் பதவி குறித்து அரசியலமைப்பில் தெளிவான விதிகள் இல்லை என்றாலும், துணை முதல்வா் மற்றும் துணைப் பிரதமரின் தேவையை அரசியல் சூழ்நிலைகள் தீா்மானிக்கின்றன. அந்த வகையில், நம் நாட்டின் சட்டம், பிரிட்டன் நாட்டின் மாதிரியை ஒத்திருக்கிறது.
நேரு - படேல் காலத்திலிருந்தே, ‘துணை’யை நியமிக்கும் நடைமுறை நடைமுறையில் இருந்து வருகிறது. ஆனால், ‘துணை’ பிரதமரோ, முதல்வரோ எதுவாக இருந்தாலும் இணையான அதிகாரம் கொண்டவை அல்ல. அது ஒரு கௌரவப் பட்டம் போன்றது, அவ்வளவே...
கட்டுரையாளா்:
அரசியலாளா்.