2-ஆவது மெட்ரோ ரயில் ஆகஸ்டில் சென்னை வருகை

சென்னை மெட்ரோ ரயில் சேவைக்காக பிரேசிலில் இருந்து 2-வது ரயில் ஆகஸ்ட் மாதம் சென்னை வரவுள்ளதாக மெட்ரோ ரயில் அதிகாரிகள் தெரிவித்தனர்.

மேலும் இந்தாண்டு இறுதிக்குள்ள 32 பெட்டிகள் அடங்கிய 8 ரயில்களும் பிரேசிலில் இருந்து சென்னைக்கு வந்தடையும் எனவும் கூறப்படுகிறது.

பிரேசில் நாட்டின் லாபா நகரில் தயாரிக்கப்பட்டு வரும் சென்னை மெட்ரோ ரயிலின் 4 பெட்டிகள் அடங்கிய முதல் ரயில், கப்பல் மூலம் மே 31-ஆம் தேதி சென்னை துறைமுகத்துக்கு வந்தடைந்தது.

துறைமுகத்தில் இருந்து கொண்டு வரப்பட்ட மெட்ரோ ரயில் பெட்டிகள் கோயம்பேடு பணிமனையில், தாற்காலிகமாக அமைக்கப்பட்டுள்ள தண்டவாளத்தில் நிறுத்தி வைக்கப்பட்டுள்ளன.

2வது ரயில் தயார்: இப்போது பிரேசிலில் 2-வது ரயிலும் தயார் நிலையில் இருப்பதாக மெட்ரோ ரயில் அதிகாரிகள் தெரிவித்தனர்.

ஆனால் ஒவ்வொரு முறையும் சென்னை மெட்ரோ ரயில் அதிகாரிகள் சென்று ஆய்வு செய்த பிறகே, ரயில் பெட்டிகளை கப்பலேற்ற அனுமதி வழங்கப்படும்.

இப்போது 4 பெட்டிகள் அடங்கிய 2-வது ரயில் ஆகஸ்ட் மாதம் வந்து சேரும் என்று எதிர்பார்க்கப்படுகிறது.

இதனையடுத்து வரும் டிசம்பர் மாதத்துக்குள் 9 ரெயில்களும் சென்னை வந்து சேரும் என்று மெட்ரோ ரயில் நிர்வாகிகள் நம்பிக்கை தெரிவித்துள்ளனர்.

மீதமுள்ள வேலைகள்: பிரேசில் நாட்டின் லாபா நகரில் மீதமுள்ள ரயில் பெட்டிகளை தயாரிப்பதற்கான வேலைகளும் விரைவாக நடைபெற்று வருகின்றன. இதில் 3-வது ரயிலில் 91 சதவீத மின் பணிகள் முடிவடைந்துள்ளன.

மேலும் பெட்டியின் வடிவமைப்பு பணிகளும் 75 சதவீதம் முடிவடைந்துள்ளன.

4,5,6-வது ரயில்களின் பெட்டிகள் தயாரிப்புப் பணிகளும் முடிவடைந்து, உள் அலங்கார வேலைகள் ஆரம்பகட்டத்தை எட்டியுள்ளன. மேலும் 7,8,9-வது ரயில்களின் பெட்டிகள் தயாரிப்புப் பணிகள் இப்போது நடைபெற்று வருகின்றன.

சோதனை ஓட்டம்: சென்னை மெட்ரோ ரயிலுக்கான சோதனை ஓட்டம் முதல்கட்டமாக கோயம்பேடு பணிமனையில் மேற்கொள்ளப்படும். இதற்காக தண்டவாளங்கள் அமைக்கும் பணிகளை மெட்ரோ ரயில் நிர்வாகம் துரிதப்படுத்தியுள்ளது.

இந்தப் பணிகள் ஜூலை 15-ஆம் தேதிக்குள் முடிக்கப்படும் என எதிர்பார்க்கப்படுகிறது. பணிமனையில் மின் பணிகள் அனைத்தும் முடியும் தருவாயில் உள்ளன.

மின் பணிகள் முடிந்தால் மட்டுமே கோயம்பேடு பணிமனையில் மெட்ரோ ரயிலுக்கான சோதனை ஓட்டத்தை நடத்த முடியும்.