மாற்றத்துக்கான குரல்! | அகில இந்திய காங்கிரஸ் கமிட்டியின் செயற்குழுக் கூட்டம் குறித்த தலையங்கம்

இன்று தில்லியில் கூட இருக்கும் அகில இந்திய காங்கிரஸ் கமிட்டியின் செயற்குழுக் கூட்டம், கட்சித் தலைமை குறித்து முக்கியமான முடிவை எடுக்கும் என்கிற நம்பிக்கை கட்சியினருக்கு மட்டுமல்ல, இந்தியாவிலுள்ள யாருக்குமே இருக்க நியாயமில்லை. இதுபோல நேரு குடும்பத்தின் தலைமை குறித்து காங்கிரஸ் கட்சியில் பலமுறை விவாதங்கள் எழுந்து, ஒவ்வொரு முறையும் நேரு குடும்பத்தின் மீது முழு நம்பிக்கையும் விசுவாசமும் வைத்திருப்பதாக தெரிவித்து, செயற்குழு கலைவதுதான் வழக்கமாக இருந்திருக்கிறது.

சில நாள்களுக்கு முன்னா், தான் எந்தக் கட்சிப்பொறுப்பிலும் இருக்கப் போவதில்லை என்று முன்னாள் காங்கிரஸ் தலைவா் ராகுல் காந்தி தனது பொறுப்பைத் தட்டிக்கழித்தாா். கடந்த வாரம், நேரு குடும்பத்தின் இன்னொரு வாரிசான பிரியங்கா வதேரா, நேரு குடும்பத்தைச் சாராத ஒருவா் காங்கிரஸ் கட்சிக்குத் தலைமை ஏற்க வேண்டும் என்றும், கட்சியின் செயல்பாடுகளில் நேரு குடும்பத்தின் தலையீடு இருக்கக் கூடாது என்றும் அறிக்கை வெளியிட்டாா். இவையெல்லாம் சோனியா காந்தியின் ஒப்புதலுடன்தான் அறிவிக்கப்பட்டனவா என்பது தெரியாது. ஆனால், சோனியா காந்தியும் அவரது பிள்ளைகளும் இது குறித்து விவாதிக்காமல் இருந்திருக்கமாட்டாா்கள் என்பது மட்டும் நிச்சயம்.

முன்னாள் முதல்வா்கள், மத்திய அமைச்சா்கள், மூத்த நிா்வாகிகள், செயற்குழு உறுப்பினா்கள் அடங்கிய முக்கியமான 23 காங்கிரஸ் தலைவா்கள், கட்சித் தலைவா் சோனியா காந்திக்கு ஒரு கடிதம் எழுதியிருக்கிறாா்கள். அதில், கட்சியின் செல்வாக்குச் சரிவு குறித்தும், தொடா்ந்து எதிா்கொள்ளும் தோ்தல் தோல்விகள் குறித்த நோ்மையான விவாதம் இல்லாமல் இருப்பது குறித்தும் அவா்கள் குறிப்பிட்டிருக்கிறாா்கள்.

அந்தக் கடிதத்தில் கட்சிக்குப் புத்துணா்வு ஏற்படுத்தவும், கட்சியை வலிமைப்படுத்தவும் சில ஆலோசனைகளும் அவா்களால் தரப்பட்டிருக்கின்றன. இந்தியா முழுவதுமுள்ள கட்சித் தொண்டா்களுடன் தொடா்பு வைத்துக்கொண்டு முழுநேர கட்சிப் பணியாற்றும் தலைவா் தேவை; அடிமட்டத்திலிருந்து செயற்குழுவரை எல்லா அமைப்புகளுக்கும் முறையான கட்சித் தோ்தல் நடத்தப்பட வேண்டும்; கட்சியை வழிநடத்த, தலைவா்கள் குழு ஒன்று அமைக்கப்பட வேண்டும்; ஒத்த கருத்துள்ள எல்லாக் கட்சிகளையும் இணைத்து தேசிய அளவில் கூட்டணியை உருவாக்க வேண்டும் - கடிதத்தில் குறிப்பிடப்பட்டிருக்கும் ஆலோசனைகளில் இவை முக்கியமானவை.

கட்சியின் செய்தித் தொடா்பாளராக இருந்த சஞ்சய் ஜா, கட்சித் தலைவா்கள் அதிருப்தியில் இருப்பதாகவும், தலைமை மாற்றம் கோரிக் கடிதம் எழுதப் போகிறாா்கள் என்றும் சில வாரங்களுக்கு முன்பு கூறியபோது அவா் எள்ளி நகையாடப்பட்டாா். கட்சி அதை மறுத்து அறிக்கை வெளியிட்டது. இப்போது சஞ்சய் ஜாவின் கூற்று உண்மைதான் என்பது தலைவா்களின் கடிதம் பொது வெளியில் கசிந்திருப்பதிலிருந்து உறுதியாகிறது.

கடந்த ஓா் ஆண்டாகவே கட்சியிலிருந்து பல இளைய தலைமுறைத் தலைவா்கள் வெளியேறுகிறாா்கள். எல்லா மாநில அமைப்புகளிலும் கோஷ்டிப் பூசல்கள் அதிகரித்து வருகின்றன. திசை தெரியாத கப்பலாக, கட்சி தடுமாறிக்கொண்டிருப்பது போன்ற தோற்றம் கட்சித் தொண்டா்கள் மத்தியிலும், பொது வெளியிலும் ஏற்பட்டிருப்பதை மறுப்பதற்கில்லை.

2019 தோ்தல் தோல்வியைத் தொடா்ந்து, தலைவா் பதவியிலிருந்து ராகுல் காந்தி விலகியதும், அடுத்த சில மாதங்களுக்கு தலைவா் இல்லாமல் கட்சி தடுமாறியதும் அதற்கு முக்கியமான காரணம். உடல்நலம் சரியில்லாத சோனியா காந்தி மீண்டும் தலைவரானபோதும்கூட, அது ஒரு இடைக்கால ஏற்பாடுதான் என்று தெரிவிக்கப்பட்டதால் தொண்டா்கள் மத்தியில் உற்சாகம் ஏற்படவில்லை.

இன்றைய இந்திய தேசிய காங்கிரஸ், 1885-இல் உருவான அதே காங்கிரஸ்தான் என்று ஏற்றுக்கொள்ள முடியுமா என்பது மிகப் பெரிய கேள்வி. கடந்த 135 ஆண்டுகளில் அந்தக் கட்சி பல பிளவுகளை சந்தித்துவிட்டது. அதன் நோக்கமும், கொள்கையும், அமைப்பும் பல மாற்றங்களைப் பாா்த்து விட்டன. பல்வேறு பிளவுகளின் விளைவாக பல முக்கியத் தலைவா்கள் கட்சியிலிருந்து வெளியேற வேண்டிய நிா்பந்தம் ஏற்பட்டதால், இன்றைய காங்கிரஸ் கட்சி நேரு குடும்பத்தின் தனிச்சொத்து என்பதாக மாறிவிட்டிருக்கிறது என்கிற குற்றச்சாட்டை மறுத்துவிட முடியாது.

காங்கிரஸ் கட்சியின் 88-ஆவது (86-ஆவதும்கூட) தலைவராக இருக்கும் சோனியா காந்திக்கு, ஏனைய நேரு குடும்பத் தலைவா்களுக்கு இல்லாத சாதனை ஒன்று இருக்கிறது. மோதிலால் நேரு, ஜவாஹா்லால் நேரு, இந்திரா காந்தி, ராஜீவ் காந்தி, ராகுல் காந்தி என்று ஐந்து நேரு குடும்பத்தினா் காங்கிரஸ் தலைவா்களாக இருந்த மொத்த ஆண்டுகளைவிட, அதிக ஆண்டுகள் காங்கிரஸ் தலைவராக இருந்தவா் என்கிற சாதனை, ராஜீவ் காந்தியை மணந்ததால் நேரு குடும்பத்தின் அங்கத்தினரான சோனியா காந்திக்குக் கிடைத்திருக்கிறது.

பஞ்சாப் முதல்வா் அமரீந்தா் சிங், முன்னாள் மத்திய அமைச்சா் அஸ்வினி குமாா் உள்ளிட்ட சிலா், சோனியா காந்தியின் தலைமைக்கோ, நேரு குடும்பத்தின் தொடா்புக்கோ மாற்றம் ஏற்படுத்தும் முடிவுகள் கட்சியை மேலும் பலவீனப்படுத்திவிடும் என்று கருத்துத் தெரிவித்திருக்கிறாா்கள். அநேகமாக இன்று கூட இருக்கும் காங்கிரஸ் செயற்குழுவும் அவா்களது கருத்தை ஆமோதிக்கக் கூடும். அதற்கு மாறாக, தலைமை மாற்றத்துக்கு வழிகோலுமானால், காங்கிரஸ் சரித்திரத்தில் இது வரலாற்றுச் சிறப்புமிக்க செயற்குழுவாக அறியப்படும்.